Xitay hökümiti amérikadiki bir shirketni ijtima'iy taratqularda xitayning teshwiqatini qilishqa yalliwalghan

Muxbirimiz erkin
2021-12-17
Share

Xitay hökümiti béyjing qishliq olimpiki diplomatik bayqut qilishqa uchrawatqan bir waqitta amérikadiki bir shirketni ijtima'iy taratqulargha tor aktiplirini qobul qilip, xitayning teshwiqatini qilishqa yalliwalghan. Amérikadiki “Ashkara mexpiyetlik” torining éytishiche, xitay ‍amérikaning néwjéyséy shtatidiki bir shirketni yalliwalghan bolup, tor aktiplirini qobul qilip, ‍ijtimay taratqularda xitayning teshwiqatini qilish 300 ming dollarliq bu toxtamning bir parchisi iken.

“Ashkara mexpiyetlik” tori 2022-yili 3-aygha qeder dawamlishidighan bu toxtamning pulini xitayning nyu-yorktiki konsulxanisi béridighanliqi, konsulxanining bu shirketke bu yil 23-noyabir küni 210 ming dollar zakalet tapshurghanliqini éytqan. Xitayning bu herikiti amérika, kanada, en'gliye, awstraliye, bélgiye, litwa qatarliq döletler xitayning Uyghurlarni basturushi seweblik béyjing qishliq olimpikini diplomatik bayqut qilghan, bayqut qilish sépige qoshulidighan döletler köpiyishke yüzlen'gen bir waqitta ashkarilandi. “Ashkara mexpiyetlik” torining éytishiche, xitay hökümiti bu shirketke “Körürmenlerni qozghitalaydighan, keng qiziqish qozghaydighan, serxil mezmunlarni tarqitidighan” tor aktiplirini qobul qilishi üchün pul töligen.

Bu xewer 17-dékabir amérikadiki bezi siyasiyonlarning diqqitini tartqan. Amérikaning b d t da turushluq sabiq bash elchisi nikéy xeyléy twittérda buninggha inkas bildürüp: “Amérika xitay olimpik musabiqisining teshwiqatini qilish üchün pul bergen dangliq shexs yaki tesirlik kishilerning ismini ashkarilishi kérek” dégen. Uning éytishiche, shi jinpingdin pul ‍alghan herqandaq kishi uning “Insan heqlirige we milyonlighan Uyghurgha irqiy qirghinchiliq qilishigha yol qoyghan bolidiken”.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet