Xitay taratquliri "Hayatim sen bilen güzel" filimini keng kölemde teshwiq qilishqa bashlighan

Muxbirimiz qutlan
2016-12-26
Share

Buningdin birqanche aylar ilgiri xitay taratquliri mexsus xewer bérip, "Hayatim sen bilen güzel" namliq chong tiptiki naxsha-ussulluq filimning Uyghur diyarida jiddiy süretke élinishqa bashlighanliqini bildürgen idi.

Bügün, yeni 26-dékabir küni xelq tori bayanat élan qilip, 50 milyon som meblegh sélin'ghan bu filimning muweppeqiyetlik halda süretke élinip bolghanliqini xewer qilghan.

Bayanatta mundaq déyilgen: "Mezkur filim junggo kinochiliq sahesidiki bir boshluqni tolduridu shundaqla pütün memlikette zor tesir qozghaydu".

Igilinishiche, mezkur filim Uyghur aptonom rayonluq medeniyet nazariti bilen " Shinjang dasén medeniyet tarqitish shirkiti" ning hemkarliqida ishlen'gen bolup, béyjingdiki dangliq xitay rézhissori yen chingshyu rézhissorluqqa teklip qilin'ghan iken.

Melumki, yéqinqi yillardin buyan Uyghur aptonom rayonida "Anarxan", "Örük chéchekligende", "Méning bayriqim", "Shundaq bir gül bar" qatarliq téléwiziye tiyatirliri bilen kino filimlar ishlinip, xitay kino bazirigha sélin'ghan. Mezkur filimlarning süretke élinish we montazh téxnikisida ilgirilesh körülgen bolsimu, emma ularning mezmunida yenila roshen siyasiy teshwiqatchiliq mezmunliri orun alghan iken.

"Hayatim sen bilen güzel" namliq bu chong tiptiki naxsha-ussulluq filimda sen'et saheside altun mukapatqa érishken gülmire muhemmet bilen xitay azadliq armiye bash siyasiy bölümi sen'et ömikining ussulchisi ümid obul bash rol alghan iken. Filimda ikki yashning muhebbet sergüzeshtisi asasiy liniye qilinip, Uyghur aptonom rayonidiki "Zamaniwiy hayat" we yashlardiki "Ilghar idiye" teshwiq qilin'ghan iken.

Közetküchiler, xitay da'iriliri zor meblegh ajritip Uyghur aptonom rayonida ishlewatqan kino-filimlerning köpinchiside siyasiy teshwiqatning asasiy meqset qiliniwatqanliqini ilgiri sürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet