Xitay hökümiti ömek teshkillep, chet elde “Güzel shinjang” teshwiqati élip barghan

Xitayning hökümet taratquliridin “Shinxu'a agéntliqi” ning 29-noyabir xewer qilishiche, xitay hökümet kabinéti (gowuyüen) axbarat ishxanisining teshkillishi bilen “Shinjang medeniyet almashturush ömiki” 11-ayning 20-künidin 29-künigiche türkiye, se'udi erebistan, qatar qatarliq döletlerge bérip, teshwiqat pa'aliyetliri élip barghan.

Xewerde déyilishiche, mezkur ömek türkiyede “Heqiqiy shinjanggha köp tereptin nezer sélish” témisida teshwiqat-tonushturush yighini ötküzgendin bashqa, türkiye maramara fondi jem'iyiti we “Her sahediki wetenperwer zatlar” bilen söhbet yighini ötküzgen؛ se'udi erebistanda bolsa, ular “Riyad géziti” bash muherriri, padishah salman ereb tili ilmiy jem'iyitining bash katipi, shundaqla bashqa tetqiqatchilar we alimlar bilen söhbet uyushturghan. Qatarda bolsa, ular qatar tashqi ishlar ministirliqi kishilik hoquq bashqarmisining bashliqi, ereb yérim arili tetqiqat merkizi, qatar dölet agéntliqi we bashqa taratqularning mes'ulliri, shundaqla mutexessisler bilen söhbet ötküzgen.

Bu pa'aliyetler dawamida, mezkur ömek xitay kompartiyesining “Shinjang istratégiyesi” ni tonushturghandin bashqa, “Shinjangdiki térrorluqqa qarshi turush, kishilik hoquqni qoghdash, shinjangdiki her qaysi milletlerning medeniyetlirini qoghdash we uninggha warisliq qildurush, shinjangdiki diniy étiqad erkinliki siyasitini izchillashturush, shinjangni yipek yoli iqtisad belbéghining merkizi qilish qurulushini ilgiri sürüsh” qatarliq keng da'irilik nuqtilarda teshwiqat élip barghan. Bu ömek yene bu jeryanda amérika bashchiliqidiki gherb döletlirining xitaygha “Qara sürkigenliki” ni qayta eskertip, bu ömekni kütüwalghan döletlerdiki xelqning xitayni chüshinishi we köz qarishini toghrilishini ümid qilidighanliqini bildürüshken.

Xewerde, bu üch dölettiki ziyaret we pa'aliyetlerning nahayiti muweppeqiyetlik bolghanliqi, mezkur döletlerdiki siyaset erbabliri we axbarat mes'ullirining xitayning “Shinjang siyasiti” ni we “Bir belbagh bir yol” istratégiyesini qet'iy qollaydighanliqini bildürgenliki qeyt qilin'ghan.

Amérikadiki xitay analizchisi, “Béyjing bahari” zhurnilining sabiq bash muherriri xu ping ependi radiyomizgha qilghan sözide, xitay kompartiyesining yéqinqi yillarda dölet sirtidiki teshwiqatni intayin etrapliq, sistémiliq we pilanliq élip bériwatqanliqini, atalmish “Shinjang hékayisi” ni yaxshi sözlesh arqiliq Uyghur élidiki medeniyet qirghinchiliqi we irqiy qirghinchiliqni inkar qiliwatqanliqini, buning, Uyghur weziyitini chüshenmeydighanlarda zor qaymuqush peyda qiliwatqanliqini, emeliyette buning amérikagha qarshi heriketning bir qismi, bir xil taktika ikenlikini bildürgenidi.