Xitay armiyesi 1959-yilidiki tibet qozghiliningning xatire künide lasada herbiy heywe körsetken

10-Mart küni tibet xelqining 1959-yilidiki zor qozghilingi xitay kompartiyesi teripidin shepqetsizlerche basturulghan bir qara kün.

Dunyaning jay-jayliridiki tibet muhajirliri 1959-yilidiki tibet qozghilingining 58 yilliqini xatirilep, xitay elchixaniliri aldida naraziliq namayishi ötküziwatqan bir peytte xitay armiyesi lasada herbiy heywe körsitishke bashlighan.

Kishilik hoquqni közitish teshkilatining nyo-yorktin bergen xewirige qarighanda, xitay hökümiti 3-ay kirishi bilen tibet rayonigha qaritilghan yoqiri bésimliq teqipini yenimu kücheytken.

Xewerde déyilishiche, 3-mart küni xitay xelq azadliq armiyesining tibette turushluq 5 ming kishilik xillan'ghan qismi ming dane herbiy aptomobil bilen birlikte lasa kochilirida herbiy küch körsetken.

Igilinishiche, nöwette tibet aptonom rayoni yoqiri derijilik bixeterlik agahlandurushi élan qilghan bolup, 2-aydin taki 3-ayning axirighiche chet'ellik sayahetchilerning tibetke kirishini chekligen.

Roytérz agéntliqining xewer qilishiche, 10-mart küni hindistan paytexti yéngi délhida yüzligen tibetler xitay elchixanisi aldida namayish ötküzüp: “Tibet xitayning bir qismi emes, bizge erkinlik kérek!” dep shu'ar towlighan.