Хитай һөкүмити тордики дини мәзмунларға қаритилған контроллуқни пүткүл хитайға кеңәйтмәктикән

Мухбиримиз ирадә
2018-09-11
Елхәт
Пикир
Share
Принт

Бирләшмә агентлиқиниң хәвиридин қариғанда, хитай һөкүмити тордики дини мәзмунларға қаритилған контроллуқни күчәйтидиған йеңи бир лайиһини елан қилған.

Мәзкур лайиһә дүшәнбә күни хитай мәмликәтлик дини ишлар идарисиниң тор бетидә елан қилинған болуп, бу дәл хитай һөкүмити уйғур елида бир милйон уйғурни лагерға қамиғандин сирт, хитайниң башқа өлкилиридики туңганлар вә христиан муритлириға қаратқан тәқибни тәдриҗий күчәйткән, черкавлар вә мәсчитләрни чеқишни тезләткән бир мәзгилгә тоғра кәлгән.

Хәвәрләргә қариғанда, юқириқи бу лайиһидә бундин кейин пәқәт дөләтниң иҗазәтнамиси болған органларниңла интернет ториға бәлгилик даиридики дини мәзмунларни йоллишиға йол қоюлидиғанлиқи, башқа һәрқандақ бир шәхсниң өз алдиға торда дини мәзмундики рәсим, син материяллири, дини мәзмундики текистләр вә дини мәзмундики син көрүнүшлириниң уланмилирини һәмбәһирлишигә қәтий йол қоюлмайдиғанлиқи бәлгиләнгән.

Фирансийә агентлиқиниң хәвәр қилишичә, юқириқи бу лайиһидә йәнә чәтәлләрдики һәрқандақ бир шәхс вә органниңму хитай ичидә динни тәшәббус қилидиған учурларни тарқитиши чәкләнгән икән. Лайиһидә йәнә буниңға хилаплиқ қилған органларниң бирдәк тақилдиғанлиқи, шәхсләрниң болса «қанунға асасән» бир тәрәп қилинидиғанлиқи билдүрүлгән.

Бирләшмә агентлиқ билән фирансийә агентлиқиниң һәр иккиси өз хәвәрлиридә хитай һөкүмитиниң динға қаратқан бундақ контрол сиясәтлириниң уйғур елида әң еғирлиқи вә буниң бәдилини бир милйондин ошуқ уйғурниң лагерда йетиш арқилиқ төләватқанлиқини, нурғун уйғурларниң пәқәт торда дини мәзмундики рәсим яки син материяллирини чиқарғанлиқи үчүнла «әсәбийлик» билән әйиблинип лагерға қамалғанлиқини баян қилған.

Чәтәлләрдики уйғур көзәткүчиләр юқириқи бу лайиһиниң бир қисим мутәхәссисләр әскәрткинидәк уйғур елида йолға қоюлуватқан қаттиқ контроллуқ сияситиниң әмдиликтә пүткүл хитайға кеңийидиғанлиқиниң очуқ бешарити икәнликини билдүрмәктә.

Пикирләр (0)
Share
Толуқ бәт