Xitay hökümiti tordiki dini mezmunlargha qaritilghan kontrolluqni pütkül xitaygha kéngeytmektiken

Muxbirimiz irade
2018-09-11
Élxet
Pikir
Share
Print

Birleshme agéntliqining xewiridin qarighanda, xitay hökümiti tordiki dini mezmunlargha qaritilghan kontrolluqni kücheytidighan yéngi bir layihini élan qilghan.

Mezkur layihe düshenbe küni xitay memliketlik dini ishlar idarisining tor bétide élan qilin'ghan bolup, bu del xitay hökümiti Uyghur élida bir milyon Uyghurni lagérgha qamighandin sirt, xitayning bashqa ölkiliridiki tungganlar we xristi'an muritlirigha qaratqan teqibni tedrijiy kücheytken, chérkawlar we meschitlerni chéqishni tézletken bir mezgilge toghra kelgen.

Xewerlerge qarighanda, yuqiriqi bu layihide bundin kéyin peqet döletning ijazetnamisi bolghan organlarningla intérnét torigha belgilik da'iridiki dini mezmunlarni yollishigha yol qoyulidighanliqi, bashqa herqandaq bir shexsning öz aldigha torda dini mezmundiki resim, sin matériyalliri, dini mezmundiki tékistler we dini mezmundiki sin körünüshlirining ulanmilirini hembehirlishige qet'iy yol qoyulmaydighanliqi belgilen'gen.

Firansiye agéntliqining xewer qilishiche, yuqiriqi bu layihide yene chet'ellerdiki herqandaq bir shexs we organningmu xitay ichide dinni teshebbus qilidighan uchurlarni tarqitishi cheklen'gen iken. Layihide yene buninggha xilapliq qilghan organlarning birdek taqildighanliqi, shexslerning bolsa "Qanun'gha asasen" bir terep qilinidighanliqi bildürülgen.

Birleshme agéntliq bilen firansiye agéntliqining her ikkisi öz xewerliride xitay hökümitining din'gha qaratqan bundaq kontrol siyasetlirining Uyghur élida eng éghirliqi we buning bedilini bir milyondin oshuq Uyghurning lagérda yétish arqiliq tölewatqanliqini, nurghun Uyghurlarning peqet torda dini mezmundiki resim yaki sin matériyallirini chiqarghanliqi üchünla "Esebiylik" bilen eyiblinip lagérgha qamalghanliqini bayan qilghan.

Chet'ellerdiki Uyghur közetküchiler yuqiriqi bu layihining bir qisim mutexessisler eskertkinidek Uyghur élida yolgha qoyuluwatqan qattiq kontrolluq siyasitining emdilikte pütkül xitaygha kéngiyidighanliqining ochuq béshariti ikenlikini bildürmekte.

Toluq bet