Хитай һөкүмити уйғур районида “тиғни ичигә қаритиш” сияситини тәшәббус қилмақта

Хитайчә “тәңритағ тори” , “шинҗаң гезити” ториниң 28-сентәбир күни чиқарған хәвиригә қариғанда, аптоном районлуқ парткомниң 10-нөвәтлик 9-қетимлиқ йиғинида “мәсилиләргә җиддий қараш еңи вә тиғни ичигә қаритиш җасаритини күчәйтәйли” дегән шоар тәкитләнгән.

Хитай компартийәси баш секретари ши җинпиңниң “төмүр соқуш үчүн биликиң күчлүк болсун” дегән сөзидин башланған бу хәвәрдә көрүлгинидәк, йиғинниң баш темиси ши җинпиңниң “шинҗаңда қилған сөзи” ниң роһини өгиниш болған; “шинҗаң хизмити” ниң партийә вә һөкүмәт хизмитидә тутидиған алаһидә орни, хитай дөлитини күчләндүрүш, хитай миллитини гүлләндүрүш билән болған һалқилиқ мунасивити тәкитлигән; шуңа “шинҗаңни түзәш” хизмити йетәрлик болди дәп қаримаслиқ керәклики, “мәсилигә җиддий қарап, тиғни ичигә қаритип, мәсилини ичидин һәл қилиш, ‛өсмә‚ ни ичидин кесип ташлаш, мәсилини һәл қилмиғучә болди қилмаслиқ, сиясий һошярлиқни өстүрүп, сиясәтниң иҗра қилиш күчини ашуруш” қатарлиқлар оттуриға қоюлған.

Бу йиғинда оттуриға чүшкән сиясәтләр хитайниң йиллардин бери давамлаштуруп келиватқан бастуруш сияситидин қанаәт һасил қилмиғанлиқини көрсәткән болуп, буниңдин кейин уни техиму қәбиһ усулда давамлаштуридиғанлиқи әндишиси пәйда қилмақта.

Ши җинпиң 2014-йил уйғур районини көздин кәчүргәндә, “қилчә рәһим қилмаслиқ” буйруқини бәргән болуп, һәр қетим “шинҗаң хизмити йиғини” ачқанда яки бу районни көздин кәчүргәндә, қаттиқ қол сияситини техиму қәбиһләштүрүп келиватқаниди. “германийә авази” ниң бу йил 8-айда елан қилған һөҗҗәтлик филимида, ши җинпиң йолйоруқ берип бастурған уйғурларниң 2-дуня урушидин кейинки әң еғир бастуруш вә ирқий қирғинчилиққа учриғанлиқи көрситилгәниди.