Xitay hökümiti Uyghur rayonida “Tighni ichige qaritish” siyasitini teshebbus qilmaqta

Washin'gtondin muxbirimiz jewlan teyyarlidi
2023.09.28

Xitayche “Tengritagh tori” , “Shinjang géziti” torining 28-séntebir küni chiqarghan xewirige qarighanda, aptonom rayonluq partkomning 10-nöwetlik 9-qétimliq yighinida “Mesililerge jiddiy qarash éngi we tighni ichige qaritish jasaritini kücheyteyli” dégen sho'ar tekitlen'gen.

Xitay kompartiyesi bash sékrétari shi jinpingning “Tömür soqush üchün biliking küchlük bolsun” dégen sözidin bashlan'ghan bu xewerde körülginidek, yighinning bash témisi shi jinpingning “Shinjangda qilghan sözi” ning rohini öginish bolghan؛ “Shinjang xizmiti” ning partiye we hökümet xizmitide tutidighan alahide orni, xitay dölitini küchlendürüsh, xitay millitini güllendürüsh bilen bolghan halqiliq munasiwiti tekitligen؛ shunga “Shinjangni tüzesh” xizmiti yéterlik boldi dep qarimasliq kérekliki, “Mesilige jiddiy qarap, tighni ichige qaritip, mesilini ichidin hel qilish, ‛ösme‚ ni ichidin késip tashlash, mesilini hel qilmighuche boldi qilmasliq, siyasiy hoshyarliqni östürüp, siyasetning ijra qilish küchini ashurush” qatarliqlar otturigha qoyulghan.

Bu yighinda otturigha chüshken siyasetler xitayning yillardin béri dawamlashturup kéliwatqan basturush siyasitidin qana'et hasil qilmighanliqini körsetken bolup, buningdin kéyin uni téximu qebih usulda dawamlashturidighanliqi endishisi peyda qilmaqta.

Shi jinping 2014-yil Uyghur rayonini közdin kechürgende, “Qilche rehim qilmasliq” buyruqini bergen bolup, her qétim “Shinjang xizmiti yighini” achqanda yaki bu rayonni közdin kechürgende, qattiq qol siyasitini téximu qebihleshtürüp kéliwatqanidi. “Gérmaniye awazi” ning bu yil 8-ayda élan qilghan höjjetlik filimida, shi jinping yolyoruq bérip basturghan Uyghurlarning 2-dunya urushidin kéyinki eng éghir basturush we irqiy qirghinchiliqqa uchrighanliqi körsitilgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.