Хитай өзбекистанға 2 милярд 700 милйон доллар қәрз һесабида ярдәм беридикән

Мухбиримиз үмидвар
2016-07-03
Share


Учур мәнбәлиридин мәлум болушичә, хитай өзбекистанға икки милярд 700 милйон америка доллири кредит, йәни қәрз соммиси аҗритидиғанлиқини билдүргән. Бу һәқтә өзбекистан президенти ислам кәримоф өзбекистан парламентида қилған сөзидә бу учурни җакарлиған.

Рус тилидики "трәнд"учур ториниң хәвиридә ейтилишичә, президент кәримоф "биз хитай тәрәпниң 2.7 Милярд америка доллири киредит беридиғанлиқи һәққидики келишимгә қол қойдуқ" дегән. Президент кәримофниң парламента сөзлигән сөз текисти бир һәптә өткәндин кейин мәтбуатта елан қилинип, мәзкур учур айдиң болған.

Явроасия хәвәрлири агентлиқиниң хәвәр қилишичә, 6 - айниң 21 - 22 күнлири хитай дөләт рәиси ши җинпиңниң ташкәнт зиярити җәрянида икки дөләт арисида бир қатар келишимләр шуниңдәк омумйүзлүк истратегийилик шерикликни раваҗландурушқа аит һоҗҗәтләр имзаланған иди.

Һазирғичә болған арилиқта өзбекистан билән хитай арисида 220 дин артуқ қануний келишимләр вә һөҗҗәтләр имзаланған болуп, хитай өзбекистанниң әң чоң сода шерикигә айлинип,өткән йили икки дөләт содиси төт милярд долларға, бу йилниң апрел ейиғичә болған арилиқта икки тәрәп содиси бир милярд төт йүз милйон долларға йәткән.

Нөвәттә өзбекистанда 650 хитай мәблиғи селинған ширкәт иш елип бармақта. Ташкәнт шәһиридә 75 хитай ширкитиниң иш башқуруш оргини тәсис қилинған.

Пәрғанә учур ториниң йезишичә, 2013 - йили шин җинпиң өзбекистанни зиярәт қилғанда, 15 милярд доллар қиммитидә 31 келишим имзаланған болса, 2014 - йили, авғустта ислам кәримоф бейҗиңни зиярәт қилғанда, йәнә 6 милярд доллар қиммитидә келишим имзаланған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт