Xitay özbékistan'gha 2 milyard 700 milyon dollar qerz hésabida yardem béridiken

Muxbirimiz ümidwar
2016-07-03
Share


Uchur menbeliridin melum bolushiche, xitay özbékistan'gha ikki milyard 700 milyon amérika dolliri krédit, yeni qerz sommisi ajritidighanliqini bildürgen. Bu heqte özbékistan prézidénti islam kerimof özbékistan parlaméntida qilghan sözide bu uchurni jakarlighan.

Rus tilidiki "Trend"uchur torining xewiride éytilishiche, prézidént kerimof "Biz xitay terepning 2.7 Milyard amérika dolliri kirédit béridighanliqi heqqidiki kélishimge qol qoyduq" dégen. Prézidént kerimofning parlaménta sözligen söz tékisti bir hepte ötkendin kéyin metbu'atta élan qilinip, mezkur uchur ayding bolghan.

Yawro'asiya xewerliri agéntliqining xewer qilishiche, 6 - ayning 21 - 22 künliri xitay dölet re'isi shi jinpingning tashkent ziyariti jeryanida ikki dölet arisida bir qatar kélishimler shuningdek omumyüzlük istratégiyilik shériklikni rawajlandurushqa a'it hojjetler imzalan'ghan idi.

Hazirghiche bolghan ariliqta özbékistan bilen xitay arisida 220 din artuq qanuniy kélishimler we höjjetler imzalan'ghan bolup, xitay özbékistanning eng chong soda shérikige aylinip,ötken yili ikki dölet sodisi töt milyard dollargha, bu yilning aprél éyighiche bolghan ariliqta ikki terep sodisi bir milyard töt yüz milyon dollargha yetken.

Nöwette özbékistanda 650 xitay meblighi sélin'ghan shirket ish élip barmaqta. Tashkent shehiride 75 xitay shirkitining ish bashqurush orgini tesis qilin'ghan.

Perghane uchur torining yézishiche, 2013 - yili shin jinping özbékistanni ziyaret qilghanda, 15 milyard dollar qimmitide 31 kélishim imzalan'ghan bolsa, 2014 - yili, awghustta islam kerimof béyjingni ziyaret qilghanda, yene 6 milyard dollar qimmitide kélishim imzalan'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet