Xitay özbékistan puqralirigha wiza bérishni toxtitip qoyghan

Azadliq radi'osining xewer qilishiche, xitay xelq jumhuriyitining özbékistan paytexti tashkentte turushluq elchixanisi özbékistan puqralirigha wiza béjirishini toxtitip qoyghan.

Melum bolushiche, asasliqi pasportida türkiye jumhuriyitining wizisi bar shexslerge wiza bérilmigen iken. Azadliq radi'osining xitay elchixane tereptin igilishiche, xitay terep bu yil 30 - awghust küni bishkektiki xitay elchixanisi bomba hujumigha uchrighandin kéyin, xitay özbékistan puqralirigha wiza bérishnimu toxtitip qoyghan. Azadliq radi'osi xitay elchnixanisigha téléfon qilip, bu ehwalni uqushqanda téléfonni qobul qilghan xadim hazir 30 - awghusttin ilgiriki wiza iltimaslirigha qarap chiqiwatqanliqini eskertken we wiza mesilisige a'it ehwalini igilesh üchün konsul bölümige téléfon qilishni sorighan. Emma azadliq radi'osi konsul bölümige toxtimay telep qilsimu, qobul qilidighan adem chiqmighan.

Tashkenttiki bir wiza we sayahet ishliri bilen shughullinidighan shirketning xadimi 9 - aydin bashlap, xitayning özbékistan puqralirining xitaygha, jümlidin ürümchige bérish üchün wiza béjirishni toxtatqanliqini bildürgen.

Xewerlerdin melum bolushiche, qirghizistanning xitaydiki konsulxanisimu qirghizistan puqralirining xitaygha, jümlidin Uyghur rayonigha bérish üchün wiza bérishni toxtitip qoyghanliqi sewebidin qirghizistan diplomatiye sahesining diqqitini tartqan.