Түркийә хитайдин 50 милйон данә корона вируси ваксиниси сетивалди

Мухбиримиз ирадә
2020-12-03
Share

Түркийә хитайниң биологийилик дора ширкити билән 50 милйон данә корона вируси ваксиниси сетивелиш һәққидә келишим түзүлгәнликини җакарлиған. Бирләшмә агентлиқиниң хәвиридин қариғанда, түркийә сәһийә министири фаһрәттин коҗа 2-декабир чаршәнбә күни елан қилған баянатида, хитайдин әвәтилидиған тунҗи ваксининиң 11-декабир күни йетип келидиғанлиқини, ваксиниларниң дәсләп түркийә тәҗрибиханилирида тәкшүрүлүп бихәтәрлики җәзмләштүрүлгәндин кейин, ишлитишкә иҗазәт берилидиғанлиқини ейтқан.

Фаһрәттин коҗа йәнә “әгәр тәрәққият биз ойлиғандәк актип давамлашса, түркийә дунядики тунҗи басқучта ваксина әмләшни башлиған дөләтләр қатаридин орун алиду,” дегән.

Һалбуки, бирләшмә агентлиқиниң хәвиридә ейтилишичә бу йил ноябирда “лансет” намлиқ хәлқаралиқ тиббий жорнал дәсләпки килиникилиқ синақларға асасән хитай ишләпчиқарған ваксинаниң үнүми тоғрисидики тәтқиқатни елан қилғанда, бу ваксининиң үнүминиң оттураһал икәнликиниң ениқланғанлиқини, ваксина арқилиқ адәм бәдинидә һасил қилинған антителаниң әмәлийәттә таҗисиман вирус билән юқумлинип сақайғанларниң бәдинидә һасил болған антителадин төвәнликини қәйт қилған вә “хитай ясиған ваксиниларниң қоғдаш үнүми давамлиқ тәкшүрүлүши керәк,” дәп бекиткән икән.

Түркийәдә һәрқайси иҗтимаий таратқуларда хитайдин киргүзүлгән бу ваксинини әмләш яки әмлимәслик һәққидә җиддий муназириләр қозғалди. Түркийәдики бир қисим даңлиқ сәнәтчиләр өзлириниң бу ваксинини әмләшни рәт қилидиғанлиқини билдүрүшмәктә.

Түркийә бундин илгири тәсир күчи 90 пирсәнт дәп баһаланған “Pfizer-BioNTech” тин бир милйон данә ваксина сетивалидиғанлиқини җакарлиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт