Türkiye xitaydin 50 milyon dane korona wirusi waksinisi sétiwaldi

Türkiye xitayning bi'ologiyilik dora shirkiti bilen 50 milyon dane korona wirusi waksinisi sétiwélish heqqide kélishim tüzülgenlikini jakarlighan. Birleshme agéntliqining xewiridin qarighanda, türkiye sehiye ministiri fahrettin koja 2-dékabir charshenbe küni élan qilghan bayanatida, xitaydin ewetilidighan tunji waksinining 11-dékabir küni yétip kélidighanliqini, waksinilarning deslep türkiye tejribixanilirida tekshürülüp bixeterliki jezmleshtürülgendin kéyin, ishlitishke ijazet bérilidighanliqini éytqan.

Fahrettin koja yene “Eger tereqqiyat biz oylighandek aktip dawamlashsa, türkiye dunyadiki tunji basquchta waksina emleshni bashlighan döletler qataridin orun alidu,” dégen.

Halbuki, birleshme agéntliqining xewiride éytilishiche bu yil noyabirda “Lansét” namliq xelq'araliq tibbiy zhornal deslepki kilinikiliq sinaqlargha asasen xitay ishlepchiqarghan waksinaning ünümi toghrisidiki tetqiqatni élan qilghanda, bu waksinining ünümining otturahal ikenlikining éniqlan'ghanliqini, waksina arqiliq adem bedinide hasil qilin'ghan antitélaning emeliyette tajisiman wirus bilen yuqumlinip saqayghanlarning bedinide hasil bolghan antitéladin töwenlikini qeyt qilghan we “Xitay yasighan waksinilarning qoghdash ünümi dawamliq tekshürülüshi kérek,” dep békitken iken.

Türkiyede herqaysi ijtima'iy taratqularda xitaydin kirgüzülgen bu waksinini emlesh yaki emlimeslik heqqide jiddiy munaziriler qozghaldi. Türkiyediki bir qisim dangliq sen'etchiler özlirining bu waksinini emleshni ret qilidighanliqini bildürüshmekte.

Türkiye bundin ilgiri tesir küchi 90 pirsent dep bahalan'ghan “Pfizer-BioNTech” tin bir milyon dane waksina sétiwalidighanliqini jakarlighan.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar