Xitayda korona wirusi bash kötürüp, 22 milyon kishi öylirige bent qilin'ghan

Muxbirimiz irade
2021-01-14
Share

Xitay ölkiliride korona wirusi yene tarqilip, 22 milyon kishi öylirige bent qilin'ghan.

"Nyu-york waqti géziti" ning xewer qilishiche, xitay hazir ötken yili yazdin buyanqi eng nachar korona wirusi yuqum mezgilini bashtin kechürüwatqan bolup, bu del xitay hökümiti özini yuqumni tézginleshte ghelibe qilduq, dep maxtiniwatqanda yüz bergen.

Melum bolushiche, bu ayning béshida béyjing etrapidiki bir ölkidiki yézida ötküzülgen toy murasimigha qatnashqanlarning wirus bilen yuqumlan'ghanliqi ashkarilan'ghan. Da'iriler buning bilen shijyaju'ang we shingtey qatarliq 17 milyondin artuq nopusi bar ikki sheherni taqighan. Bir nechche kün ichide barliq ahalilerni tekshürüshni buyruqi chüshürgen. Qatnashni toxtitip, toy, depne murasimi we yighinlarni emeldin qaldurghan.

Bu hepte béshida bolsa qamalni béyjing, langfang we shundaqla xéylongjyang ölkisige qarashliq bir nahiyegiche kéngeytken. Jem'iy 22 milyondin artuq kishi öyidin chiqmasliqqa buyrulghan.

"Nyu-york waqti géziti" ning éytishiche, bu xitayda ötken yili 1-ayda xitay merkizi hökümiti wirus tunji qétim bayqalghan merkizi sheher wuxenni taqighanda tesirge uchrighan ammining ikki hessisige teng bolup, kölem jehettin qarighanda bu qétimliq taqashni pewqul'adde dep qarashqa bolidiken.

Hazir shimaldiki shenshi ölkisi we xéylungjyang we jilin qatarliq ölkilerdimu yéngi yuqum ehwalliri körülgen. Shangxey shehiri yuqum tézginlesh tedbirlirini ashurghan. Wirus eng deslep tarqalghan wuxende yene bir qétimliq taqash bolidighanliqi heqqide mish-mish paranglar boluwatqan iken.

"Nyu-york waqit géziti" ning éytishiche, bu qétimliq yuqum xitay hökümitining "Wirusni tézginleshte ghelibe qazanduq", dep qiliwatqan teshwiqatining sugha chilishishigha sewebchi bolup qélishi mumkin iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet