Хитайда мәйданға кәлгән ваксина сәтчиликигә четилип 130 адәм қолға елинған

Мухбиримиз җүмә
2016-03-26
Share

Хитайда мәйданға кәлгән сахта ваксина сәтчиликигә четилип 130 адәм қолға елинған.

Мәлум болушичә, хитайда сахта ваксиниларниң тарқалғанлиқиға аит тәкшүрүш өткән йилиниң бешидила башланған болуп, 2015 - йили апрелда мәзкур сахтилиққа баш болғанлиқи илгири сүрүлгән бир аял тутқун қилған.

Б б с да хәвәр қилишичә, хитай даирилири башлиған мәзкур тәкшүрүш һәрикити вә қолға елинған мунасивәтлик шәхсләр һәққидики хәвәрләр җамаәткә ашкариланмиған.

«Дәвәр журнили» ниң көрситишчә, юқирида тилға елинған аял шәндуң өлкисидин болуп, у, 2010 - йилидин буян қизи билән бирликтә сахта ваксиниларни тарқитиш қилмиши билән шуғулланған.

Даириләр мәзкур сахта ваксина тарқитиш ториниң 24 өлкигә таралғанлиқи, буларниң 90 милйон доллар қиммитидики мүҗмәл ваксиниларни тарқатқан болуши мумкинлики вә тарқитиш ториға четилған 130 адәмни қолға алғанлиқини билдүргән.

Даириләр 21 - март елан қилған баянатида нөвәттә таралған сахта яки мәсилә бар ваксина түриниң 12 хилға йетидиғанлиқини билдүргән.

Бу йил январда игилигән хәвәрлиримиздә уйғур елиниң қәшқәр вә ғулҗа тәвәсидә қизил юқуминиң ямраватқанлиқи ашкариланған. Әйни чағда зияритимизни қобул қилған хадимлар қизил ваксиниси әмләнгән баллардиму юқум әһвали көрүлгәнликидин әҗәбләнгәнликини билдүрүшкән. Бу һәқтә тохталған мутәхәссисләр ваксининиң вақти өткән яки сахта болуш еһтималлиқини илгири сүргән иди.

Һалбуки хитай даирилири мәсилә бар ваксиниларниң уйғур елидә таралған яки таралмиғанлиқини ашкарилимиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.