Xitayda meydan'gha kelgen waksina setchilikige chétilip 130 adem qolgha élin'ghan

Xitayda meydan'gha kelgen saxta waksina setchilikige chétilip 130 adem qolgha élin'ghan.

Melum bolushiche, xitayda saxta waksinilarning tarqalghanliqigha a'it tekshürüsh ötken yilining béshidila bashlan'ghan bolup, 2015 - yili aprélda mezkur saxtiliqqa bash bolghanliqi ilgiri sürülgen bir ayal tutqun qilghan.

B b s da xewer qilishiche, xitay da'iriliri bashlighan mezkur tekshürüsh herikiti we qolgha élin'ghan munasiwetlik shexsler heqqidiki xewerler jama'etke ashkarilanmighan.

“Dewer zhurnili” ning körsitishche, yuqirida tilgha élin'ghan ayal shendung ölkisidin bolup, u, 2010 - yilidin buyan qizi bilen birlikte saxta waksinilarni tarqitish qilmishi bilen shughullan'ghan.

Da'iriler mezkur saxta waksina tarqitish torining 24 ölkige taralghanliqi, bularning 90 milyon dollar qimmitidiki müjmel waksinilarni tarqatqan bolushi mumkinliki we tarqitish torigha chétilghan 130 ademni qolgha alghanliqini bildürgen.

Da'iriler 21 - mart élan qilghan bayanatida nöwette taralghan saxta yaki mesile bar waksina türining 12 xilgha yétidighanliqini bildürgen.

Bu yil yanwarda igiligen xewerlirimizde Uyghur élining qeshqer we ghulja teweside qizil yuqumining yamrawatqanliqi ashkarilan'ghan. Eyni chaghda ziyaritimizni qobul qilghan xadimlar qizil waksinisi emlen'gen ballardimu yuqum ehwali körülgenlikidin ejeblen'genlikini bildürüshken. Bu heqte toxtalghan mutexessisler waksinining waqti ötken yaki saxta bolush éhtimalliqini ilgiri sürgen idi.

Halbuki xitay da'iriliri mesile bar waksinilarning Uyghur élide taralghan yaki taralmighanliqini ashkarilimidi.