2023-Yilining shi jinping üchün müshkülatqa tolghan bir yil bolushi texmin qilinmaqta

Xitay re'isi shi jinpingning hoquqni öz qolida ching tutup turushni muweppeqiyetlik halda emelge ashuralighan bolsimu nöwette tolimu musheqqetlik bir yilgha duch kéliwatqanliqi “Wal sitrét zhurnili” gézitining 14-yanwardiki obzor maqaliside alahide sherhlendi.

Chun xanwong imzasidiki obzorda éytilishiche, ammiwi saghlamliq we iqtisadiy krizis nöwette shi jinping duch kéliwatqan ikki chong müshkülat bolup, shi jinping yéqinda qolgha keltürgen üchinchi nöwetlik “Padishahliq” qa éghir saye tashlap turghan amillardin bolup qalghan. Bezi mutexessisler xitay hökümitining “Wirusni nölge chüshürüsh” nishanidin birdinla qaytishini öz putigha özi palta chapqanliq, dep qarighan. Ene shu xil pikirdiki kishilerning biri proféssor alfréd wu (Alfred Wu) bolup bu heqte ehwal tonushturup “Buningdin qarighanda 2023-yili shi jinping üchün apetlik bir yil bolushi mumkin” dégen. Uning pikriche, nöwette xitay kompartiyesi pütün küchini wirus wabasi keltürüp chiqarghan ijtima'iy we iqtisadiy jarahetlerni dawalash, shuningdek xelq ammisining ishenchini eslige keltürüshke serp qiliwatqan bolup, shi jinping hazirqi barliq eyibleshlerge jawabkar bolushi lazim iken.

Obzorda éytilishiche, xitay kompartiyesi alahide tekitlep kéliwatqan “Herqandaq shara'itta partiye merkiziy komitétigha mutleq sadiq bolush” heqqidiki chaqiriq öz nöwitide héchkimning shi jinpingni tenqidlishige imkaniyet qaldurmighan. Yene bir yaqtin shi jinping bu xil tenqidtin saqlinish üchün “Nöwette biz wirusni kontrol qilishning yéngi basquchigha méngiwatimiz. Bizni kütüp turghan qattiq sinaqlardin ongushluq ötüp kétishimiz üchün ortaq tirishishimiz lazim. Ittipaqliq küch” dégendek debdebilik nutuqlarni sözlep turghan. Wirus yuqumining partlash xaraktérlik yamrishi, buning tesiride teminlesh zenjirining üzülüp qélishi, mukemmel saqliqni saqlash sistémisining bolmasliqi dégendek sewebler tüpeylidin hazir istémalchilar we ishlepchiqarghuchilarning sanida oxshashla chékinish barliqqa kelgen.

Xelq'ara munasiwetler nuqtisidin alghanda shi jinpingning ukra'ina urushida rusiyeni astirtin qollap-quwwetlishi tüpeylidin xitay bilen gherbning munasiwiti barghanséri yirikliship mangghan.

Xitayning teywen boghuzi etrapidiki herbiy ighwagerchilikliri éship méngiwatqan bolsimu, amérika hökümiti dawamliq türde teywen'ge herbiy qoral-yaraq sétip bérishni dawam qildurup kelgen. Aptor bunimu xitay üchün bir yéngi apet bolup qéliwatidu, dep alahide tekitleydu.