“хитайниң солженитсини” ляв йиву: “хитай парчиланмиса, пүтүн дуня үчүн тәһдит болиду”

Мухбиримиз әркин
2019.04.05

“хитайниң солженитсини” дегән намға еришкән атақлиқ хитай язғучиси ляв йиву җүмә күни “әгәр хитай парчиланмиса пүтүн дуня үчүн тәһдит” икәнликини билдүргән.

Фирансийә агентлиқиниң хәвәр қилишичә, у бу сөзләрни өзиниң фирансийәдә нәшр қилинған “оқ вә әпйүн” намлиқ китабида тәкитлигән. Ляв йиву илгири “қирғинчилиқ” намлиқ шеирни йезип, хитай компартийәсиниң тйәнәнмен оқуғучилар һәрикитини бастурғанлиқини тәнқид қилғанлиқи үчүн түрмидә ятқан.

Фирансийә агентлиқиниң хәвиридә тәкитлишичә, ляв йиву йеңи нәшр қилинған “оқ вә әпйүн” намлиқ китабида “хитайниң 10 яки униңдинму көп дөләткә парчилиниши керәклики” ни илгири сүргән. У “бу мениң арзуюм. Чүнки хитай бүгүнки һалити билән пүтүн дуня үчүн тәһдит” дегән. Униң “оқ вә әпйүн” намлиқ мәзкур китаби хитайда чәкләнгән болуп, униңға тйәнәнмен вәқәсигә қанашқан бәзи шаһитларниң кәчүрмишлири киргүзүлгән.

Ляв йиву 2011‏-йилдин бери германийәниң берлин шәһиридә яшап кәлмәктә. У “хитайға қайтип кетишниң өзи үчүн мәсилә әмәсликини, пәқәт юрти сичүән мустәқил болса қайтип кетишни халайдиғанлиқи вә шуниңда көңлиниң тәскин тапидиғанлиқи” ни билдүргән. Униң фирансийә агентлиқиға тәкитлишичә, у ши җинпиңниң истибдат рәһбәрликидики хитайниң истиқбалиға “интайин үмидсиз” қарайдикән.

Ляв юву йәнә ғәрб дөләтлирини тәнқитләп, “тйәнәнмин қирғинчилиқида хитайни тәнқит қилған ғәрб дөләтлири әмдиликтә хитай давамлиқ кишиләрни қолға еливатқан, өлтүриватқан болсиму, лекин улар йәнила бу җаллатлар билән сода қилиш үчүн бир-бири билән җедәл қилишмақта” дегән. Ляв йиву хитай һөкүмити икки милйондәк уйғур, қазақ вә башқа йәрлик милләтләрни йиғивелиш лагерлириға қамап, йүзмиңлиған уйғурни қамақ җазалириға буйруған, бу хәлқарада қаттиқ наразилиққа учраватқан бир мәзгилдә бу сөзләрни қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.