Xitay hökümiti ichki malimanchiliqni peseytish salmiqini ashurmaqta

“Washin'gton waqti géziti” ning 16-dékabirdiki xewirige qarighanda, yéqinqi mezgillerde xitayning ichkiri ölkiliride keyni-keynidin yüz bériwatqan pichaqliq hujum, mashiniliq hujum qatarliqlar xitay puqralirining jem'iyetke bolghan naraziliqini menbe qiliwatqan bolghachqa bu hal xitay hökümiti emeldarlirini bi'aram qilishqa bashlighan.

Xewerde éytilishiche, xitaydiki künséri küchiyiwatqan ijtima'iy naraziliqqa qarita xitay emeldarliri bixeterlik tedbirlirini kücheytish, shu arqiliq dölet iqtisadining saghlam rawajlinishigha zit bolghan mesililerni basturuwétishke urunmaqta iken. Xewerde qeyt qilinishiche, xitay iqtisadning toxtap qélishi we dawalghush peyda qilishini xitay emeldarliri we puqraliri yéqinqi mezgillerde ewj élishqa bashlighan bir qatar zorawanliq weqelirini köpeytiwetti, dep endishe qilishqa bashlighan.

Xewerde körsitilishiche, xitay kompartiyesi merkiziy komitétining siyasiy biyurosi puqralardiki iqtisadiy qiyinchiliq bilen ijtima'iy dawalghushning baghlinishi barliqini ochuq-ashkara étirap qilghan. Shuningdek, emeldarlarni “Jem'iyetning muqimliqigha kapaletlik qilish” meqsiti bilen “Xelq turmushini qoghdash” qa buyrughan.

Xitaydiki iqtisadiy we siyasiy jehettiki bésimlar, shuningdek xitayda arqa-arqidin yüz bériwatqan ijtima'iy parakendichilik we türlük qatilliq weqeliri xitay hakimiyitini sarasimige séliwatqanliqi melum. Wahalenki, nöwette donald trampning yéngi kabént ezalirining xitaygha muresse qilmaydighan qattiq qol siyasetchilerdin teshkil tépiwatqanliqi, shuningdek “Soda urushi” ning téximu qattiq shekilde bashlinish éhtimalliqi xitay hakimiyitini téximu chong sarasimige séliwatqan mesililerning biri dep qaralmaqta.