Xitay Uyghur élida dölet xewpsizliki terbiyesi teshwiqat pa'aliyiti bashlighan

Xitay hökümitining Uyghurlargha qaritiwatqan irqiy qirghinchiliqi xelq'arada küchlük naraziliq qozghawatqan bir peytte, xitay da'iriliri Uyghur élida “Dölet xewpsizliki terbiyesi teshwiqat pa'aliyiti” ni qanat yaydurghan.

“Tengritagh” torining xewiridin qarighanda, mezkur heriket herqaysi jaylar, herqaysi tarmaqlarda omumiyyüzlük élip bériliwatqan bolup, bu arqiliq “Keng ammining dölet xewpsizliki éngini kücheytip, xewp-xeterning aldini élish we uninggha taqabil turush iqtidarini östürüldi,” déyilgen.

Xewerde yene mundaq diyilgen: “Bu teshwiqat herikitide kishilerge asasiy qanun, dölet xewpsizliki qanuni, térrorizmgha qarshi turush qanuni, jasusluqqa qarshi turush qanuni, tor bixeterliki qanuni qatarliq qanun-nizamlar zor küch bilen teshwiq qilindi. Dölet xewpsizlikide hemme kishining mes'uliyiti bar, deydighan qoyuq keypiyat yaratti.”

Chet ellerdiki Uyghur közetküchilerning qarishiche, xitayning Uyghur élida omumiyyüzlük halda dölet xewpszlikini qoghdash terbiyesi yürgüzüshi uning Uyghurlargha yürgüzüwatqan irqiy qirghinchiliqi sewebidin xelq'arada osal ehwalgha qélishi bilen zich munasiwetlik bolup, u xitayning Uyghur élidiki kontrolini yoqitip qoyush endishisini namayen qilidiken.