Xitay hökümiti “Shinjang obrazi” ni qayta tiklesh üchün “Xelq'ara alaqe merkizi” namliq tor supisi qurghan

Gherb elliri teripidin Uyghurlargha “Irqiy qirghinchiliq” qilish bilen eyibliniwatqan xitay hökümiti, 2025-yilining kirishi bilenla uninggha qaritilghan xelq'ara tenqidlerni basturup, “Shinjang obrazni qayta tiklesh” ning salmiqini téximu kücheytishke kirishken.

Xitay taratqulirining xewerliride, xitay hökümitining ürümchide mexsus “Xelq'ara alaqe merkizi” tesis qilghanliqi qeyt qilinmaqta. Yeni xitayning dölet ichi we tashqi dunyagha qaratqan Uyghur élige munasiwetlik barliq teshwiqati ürümchini baza qilghan “Xelq'ara alaqe merkizi” arqiliq bir tutash élip bérilidiken.

“Xitay axbarat qurulushi” namliq axbarat türining 10-yanwar élan qilghan bu heqtiki xewiride, “Xelq'ara alaqe merkizi” ning rayondiki “Kishilik hoquq depsendichiliklirige qaritilghan tenqidi muhitni tazilash wezipisini atqursimu, emma bu heriket bu rayonning selbiy obrazini yaxshilash yolidiki keng kölemlik teshwiqatning peqet bir parchisi” ikenlikini bildürgen.

Melum bolushiche, Uyghur aptonom rayonluq tor bashqurush ishxanisi ötken yili 12-ayning axirliri “Xelq'ara alaqe merkizi” ning ürümchide qurulidighanliqini élan qilghan. Xewerde bu merkez “Shinjangning tashqi dunyagha échilghan resmiy közniki” bolidighanliqi, uning “Köp shekil we köp xil qanallar arqiliq, xelq'ara jem'iyetke yéngi dewrdiki shinjang hékayisini sözleydighanliqi” ilgiri sürülgen. “Xelq'ara alaqe merkizi” yéqinqi 2 yildin buyan xitaydiki 28 ölke we sheherde tesis qilin'ghan bolsimu, emma uning bu qétim ürümchide qurulushi hem teshwiqat supisi qilinishi, xitayning xelq'arada Uyghurlargha “Irqiy qirghinchiliq” qilghanliqini ret qilip, bu rayonni “Her millet xelqi bextlik yashawatqan normal bir jem'iyet” qilip perdazlash yolidiki teshwiqatini téximu kücheytidighanliqidin dérek, dep qaralmaqta.

“Xitay axbarat qurulushi” ning bildürüshiche, hazirgha qeder bu teshwiqatni shinxu'a agéntliqi, “Xelq géziti” qatarliq hökümet taratquliri arqiliq yürgüzüp kelgen xitay hökümiti, emdilikte bu rayonda köp sanliqni teshkil qilidighan “Az sanliq milletler” ni körünüsh qilish arqiliq, téximu köp sayahetchilerni jelp qilishqa tutush qilghan. Halbuki, xitay qandaq bir wasite qollinishidin qet'iynezer, bu rayon xelq'aragha b d t ning “Xitay hökümiti musulman türkiy xelqlerge qarita ‛insaniyetke qarshi jinayet‚ sadir qiliwatidu” dégen doklatini élan qilishi bilen tonulghan iken.

Melum bolushiche, bu “Merkez” Uyghur aptonom rayonluq partkomning zuwani bolghan “Shinjang géziti” ning kontrolluqidiki “Shinjang axbarat guruhi” ning bashqurushida bolidiken. “Shinjang axbarat guruhi” bolsa rayondiki gézit-zhurnallar, tor béketliri we bir tor supisini kontrol qilidiken.