Xitay azadliq armiyesining xongkong qisimliri élan qilghan sin körünüshliri diqqet qozghidi

Xitay azadliq armiyesining xongkongda turushluq qisimliri aldinqi küni xitayning “Wéybo” toridiki resmiy hésabi arqiliq bir qanche parche sin körünüshlirini tarqatqan. Mezkur sin körünüshliride xongkongdiki xitay azadliq armiyesining her xil ilghar tipliq qorallar, tik uchar we bashqa herbiy esliheler arqiliq tuyuqsiz weqelerni, namayishlarni bir terep qiliwatqan körünüshliri orun alghan.

Xongkongda 8 heptidin béri puqralar namayish qilip “Qachqunlarni ötküzüp bérish qanun layihesi” ni bikar qilishni telep qiliwatqan idi. 27‏-Iyul küni xongkongning yüenlang békitide namayishchilar bilen saqchilar otturisida toqunush partlighandin kéyin, 28‏-iyul küni nechche on minglighan xongkongluq dawamliq namayish qilip, saqchilarning puqralargha qoral ishletkenliki, “Hökümetning qara jem'iyetler bilen til biriktürgenliki” ge naraziliq bildürgen. Naraziliq namayishi yene toqunushqa aylan'ghan idi.

Közetküchilerning diqqitini qozghighini, yuqiriqi bu sin körünüshlirining del mushu mezgilde élan qilishi boldi. Uning üstige bu widiyolarda herbiylerning atalmish topilangchilarni qoghlawatqan körünüshliride gu'angdung tilini ishlitishimu küchlük diqqet qozghidi. Közetküchiler buni xitay hökümitining xongkongda namayish qiliwatqan nechche on minglighan xongkongluqlargha bergen ochuq-ashkara ségnali, dep qarimaqta.

Yuqiriqi sin körünüshliri tiwittér toridimu küchlük inkas qozghidi. Awstraliye makkuwéri uniwérsitétining oqutquchisi kéwin korriko tiwittirda buninggha “Xitay azadliq armiyesining eng yaxshi bilidighan ishi qolida tömürning sunuqimu bolmighan namayishchilarni qirghin qilishi emesmu” dep inkas qayturghan.