Хитайниң ялланма инкасчилири уйғур паалийәтчилиригә қарши торда һәрикәт қозғиған

Мухбиримиз шөһрәт һошур
2019-04-10
Елхәт
Пикир
Share
Принт

Хитайниң «йәр шари вақти» гезитиниң хәвәр қилишичә, хитайниң бир түркүм аталмиш вәтәнпәрвәр тор әзалири бүгүн йәни 10-апрел күни аталмиш аммиви инкас һәрикити қозғап, ғәрбниң уйғур райони вәзийити һәққидики аталмиш «ялғанчилиқлири» ға зәрбә бәргән.

Хәвәрдә дейилишичә, бу, хитай тор әзалири аталмиш «шәрқи түркистан террорчилири» ниң фәйсбок бәтлиригә 20 минут ичидә 1000дин артуқ инкас язған.

Инкасларда 2009‏-йилдики үрүмчи вәқәси, 2014‏-йилдики кунмиң вәқәси вә уйғур районидики аталмиш тәрәққиятларға аит рәсимләр йолланған вә пикир баян қилинған.

Хәвәрдә бу аталмиш вәтәнпәрвәр инкасчиларниң саниниң дәсләптә 2000 болған болса, бир күн ичидә 5000 ға көпәйгәнлики әскәртилгән.

Муһаҗирәттики уйғур паалийәтчилириниң билдүрүшичә, ялланма инкасчилар йеңи бир қошун әмәс, хәлқарада бир мәһәл «вумавдаң» йәни «әллик тийинчиләр партийәси» дәп нам алған бу инкасчилар хитай компартийәсиниң мукапати вә риғбәтләндүрүши билән 2008-йилидики бейҗиң олимпик мәзгилидиму торларда баш көтүргән вә хитай һакимийитиниң зораван сиясәтлиригә чапан япқан.

Бу инкасчиларниң хитайниң нөвәттики сиясий вә иқтисадий системисидин нәп еливатқан кишиләр икәнликини илгири сүргән муһаҗирәттики уйғур паалийәтчиләр өзлириниң бу инкаслардин әҗәпләнмәйдиғанлиқи вә ялланма инкасчиларниң уйғур вәзийити һәққидики хәлқара җамаәт пикри еқимини өзгәртиветәлмәйдиғанлиқини оттуриға қойди.

«Йәр шари вақти» гезитиниң мәзкур хәвиридә баян қилинишичә, бу қетимқи бу аталмиш вәтәнпәрвәрләр гурупписиниң йетәкчилиридин бири қурулуш материяллири содигири йин йүәнчең дегән киши икән. Уйғур паалийәтчиләрниң дейишичә, «уйғур районида йиғивелиш лагерлири қурулғандин буян әң зор пайдиға еришкән мәнпәәт гуруппилиридин бири хитай қурулуш содигәрлиридур».

Пикирләр (0)
Share
Толуқ бәт