Xitayning yallanma inkaschiliri Uyghur pa'aliyetchilirige qarshi torda heriket qozghighan

Muxbirimiz shöhret hoshur
2019-04-10
Élxet
Pikir
Share
Print

Xitayning "Yer shari waqti" gézitining xewer qilishiche, xitayning bir türküm atalmish wetenperwer tor ezaliri bügün yeni 10-aprél küni atalmish ammiwi inkas herikiti qozghap, gherbning Uyghur rayoni weziyiti heqqidiki atalmish "Yalghanchiliqliri" gha zerbe bergen.

Xewerde déyilishiche, bu, xitay tor ezaliri atalmish "Sherqi türkistan térrorchiliri" ning feysbok betlirige 20 minut ichide 1000din artuq inkas yazghan.

Inkaslarda 2009‏-yildiki ürümchi weqesi, 2014‏-yildiki kunming weqesi we Uyghur rayonidiki atalmish tereqqiyatlargha a'it resimler yollan'ghan we pikir bayan qilin'ghan.

Xewerde bu atalmish wetenperwer inkaschilarning sanining deslepte 2000 bolghan bolsa, bir kün ichide 5000 gha köpeygenliki eskertilgen.

Muhajirettiki Uyghur pa'aliyetchilirining bildürüshiche, yallanma inkaschilar yéngi bir qoshun emes, xelq'arada bir mehel "Wumawdang" yeni "Ellik tiyinchiler partiyesi" dep nam alghan bu inkaschilar xitay kompartiyesining mukapati we righbetlendürüshi bilen 2008-yilidiki béyjing olimpik mezgilidimu torlarda bash kötürgen we xitay hakimiyitining zorawan siyasetlirige chapan yapqan.

Bu inkaschilarning xitayning nöwettiki siyasiy we iqtisadiy sistémisidin nep éliwatqan kishiler ikenlikini ilgiri sürgen muhajirettiki Uyghur pa'aliyetchiler özlirining bu inkaslardin ejeplenmeydighanliqi we yallanma inkaschilarning Uyghur weziyiti heqqidiki xelq'ara jama'et pikri éqimini özgertiwételmeydighanliqini otturigha qoydi.

"Yer shari waqti" gézitining mezkur xewiride bayan qilinishiche, bu qétimqi bu atalmish wetenperwerler guruppisining yétekchiliridin biri qurulush matériyalliri sodigiri yin yü'enchéng dégen kishi iken. Uyghur pa'aliyetchilerning déyishiche, "Uyghur rayonida yighiwélish lagérliri qurulghandin buyan eng zor paydigha érishken menpe'et guruppiliridin biri xitay qurulush sodigerliridur".

Toluq bet