Хитай даирилири: “хитай, явро-асия дөләтлириниң иқтисадий вә сода һәмкарлиқини чоңқурлаштурушта актип рол ойнайду”

Вашингтондин мухбиримиз уйғар тәйярлиди
2024.06.12

“шинҗаң гезити” ниң 6-айниң 12-күнидики хәвиригә асасланғанда, хитай сода министирлиқи, хитай ташқи ишлар министирлиқи, хитай хәлқара содини илгири сүрүш комитети вә уйғур аптоном районлуқ хәлқ һөкүмитиниң қоллиши билән “йипәк йолидики йеңи пурсәтләр, асия вә явропадики йеңи һаятий күч” темисидики 8-нөвәтлик хитай-явро-асия йәрмәнкиси 26-июндин 30-июнғичә үрүмчидә өткүзүлидикән.

 Хитай-явро-асия көргәзмисигә қуюлидиған мәһсулатлар енергийә, рәқәмлик техника, мәдәнийәт саяһәтчилики, ашлиқ вә нефит, органик мевә вә көктат мәһсулатлири шуниңдәк йәнә, чарвичилиқ, пахта вә тоқумичилиқ мәһсулатлири қатарлиқларни өз ичигә алидикән. Бу йәрмәнкигә қатнашқучиларниң даириси кәң, қатнишиш нисбити юқири болуп, хитай сода министирлиқи даирилириниң өз мәтбуатлириға билдүрүшичә, 50 дөләт, район вә хәлқаралиқ тәшкилат, 30 өлкә, аптоном район, мәркәзгә биваситә қарашлиқ шәһәр, шинҗаң ишләпчиқириш вә қурулуш биңтүәни вә аптоном райондики 14 вилайәт, шәһәрдин кәлгән 1000 дин артуқ ширкәт һәм орган йәрмәнкигә қатнишидикән.

Америка һөкүмити уйғур мәҗбурий әмгики билән ишләпчиқирилған мәһсулатларниң америка базириға киришиниң алдини алғандин кейин хитайниң уйғур елини сода, енергийә, ашлиқ базиси, шундақла муһим иқтисадий түгүн қилип қуруп чиқиш қәдимини тезләткән. Шуниңдәк йәнә оттура асиядин явропаға, җәнубий асиядин оттура шәрқ вә африқа дөләтлиригичә созулған ғайәт зор “бир бәлбағ бир йол” қурулушни техиму тезләткән иди. Бу қетимқи хитай-явро-асия йәрмәнкиси хитайниң уйғур елини сода вә иқтисадий түгүн қилип қуруп чиқиш, оттура шәрқ, африқа вә явропа дөләтлиригә мал сетиш, бу районлардики иқтисадий тәсирини кеңәйтиш үчүн елип берилған бир паалийәт дәп қаралмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.