Yawropa ittipaqi-xitay soda ixtilapi qizishqa bashlighan, xitay yawropa ittipaqini WTO gha erz qilghan

Yawropa ittipaqi bilen xitay arisida soda urushi partlash signalliri chélinishqa bashlighan bolup, xitay hökümiti yawropa ittipaqining xitay éksport qilghan tokluq aptomobillirigha baj qoyushini dunya soda teshkilatigha erz qilghan.

Yawropa ittipaqi, xitay hökümitining xitay tokluq aptomobil sana'itini qoshumche yardem bilen teminlep, adaletsiz riqabet peyda qilish bilen eyiblep kelgen idi. “Yaxu maliye xewerliri” torining bildürüshiche, xitay soda ministirliqi yawropa ittipaqining xitay tokluq aptomobillirigha 48 pirsentkiche baj qoyush qararining qanunsiz ikenlikini ilgiri sürüp, dunya soda teshkilatining késim chiqirish méxanizmigha resmiy erz sun'ghan.

Xitay soda ministirliqi bayanatchisining bu heqtiki bayanatida, “Yawropa ittipaqining qarari pakit we qanuniy asaslardin yiraq bolup, dunya soda teshkilatining belgilimilirige xilap. Shundaqla bu kilimat özgirishige qarshi yer shariwiy hemkarliqqa buzghunchiliq qilghan” dep körsetken.

Kishilik hoquq teshkilatliri Uyghur mejburiy emgikining xitay tokluq aptomobil sana'itining matériyal pishshiqlap ishlesh basquchigha merkezleshkenliki sewebidin kishilik hoquq émbargosi qoyushqa chaqiriq qilip kelgen bolsimu, emma yawropa komissiyoni bu yil 7-ayda, tokluq aptomobil ishlepchiqirishigha xitayning qoshumche yardem bérishi sewebidin baj qoyghan idi. Buning aldida, yeni bu yil 4-ayda yawropa parlaménti mutleq köp awazning maqullishida yawropa ittipaqining mejburiy emgek mehsulatlirini cheklesh qanuni maqullap, mejburiy emgek, jümlidin balilar emgikide ishlepchiqirilghan mehsulatlarning yawropa bazirigha kirishini chekligen idi. Bu qanun kishilik hoquq teshkilatlirining qarshi élishigha érishken bolsimu, emma uning Uyghur mejburiy emgek mehsulatlirini ünümlük tosushi so'al peyda qilghan. Bu qanun chiqirilip uzun ötmey “Shinjang pemiduri” mehsulatlirining yawropa-asiya ottura liniye tiransport yoli arqiliq italiye kirgenliki melum bolghan. Bu qétim xitayning ötken ayda amérikaning xitay tokluq aptomobillirigha 100 pirsentkiche baj élish qararidin kéyin, amérikani dunya soda teshkilatigha erz qilishidin buyan, nöwette yawropa ittipaqining üstidinmu erz sunushidur.