Xitay da'iriliri ürümchide ötküzülgen yawro-asiya yermenkisining ghelibilik bolghanliqini élan qildi

Xitay da'iriliri 26-iyun ürümchide bashlan'ghan 8-qétimliq yawro-asiya yermenkisining 30-iyun ghelibilik axirlashqanliqi we besh künlük yermenkide 610 milyard yüendin artuq qimmettiki toxtam imzalan'ghanliqini bildürmekte. Xitay hökümet taratqulirining ilgiri sürüshiche, xitay soda ministirliqi, tashqi ishlar ministirliqi, xitay sodini ilgiri sürüsh jem'iyiti we Uyghur aptonom rayonluq hökümet birliship ötküzgen “Yipek yolidiki pursetler we yawro-asiyaning yéngi hayatliq küchi” namliq bu yermenkide, qimmiti 610 milyard yüendin ashidighan jem'iy 360 tin artuq toxtam imzalan'ghan iken.

Lékin xelq'arada, xitayning Uyghurlargha irqiy qirghinchiliq qilishini jawabkarliqqa tartish, Uyghur mejburiy emgiki mehsulatlirini cheklesh chuqanliri dawamlishiwatqan bir waqitta ötküzülgen bu yermenke, xitayning ötken yili korona wirusi yuqum qamilining bikar qilishidin kéyin Uyghur élini échishni téximu kücheytip, xelq'araliq bayqut we jazadin qutulush urunushlirini körsitidu, dep qaralmaqta.

Halbuki, xitayning 8-qétimliq ürümchi “Yawro-asiya yermenkisi” bashlinip bir kün kéyin, en'gliye yuqiri sot mehkimisi kishilik hoquq teshkilatlirining “Shinjang toqumichiliq mehsulatliri” ni chekleshke munasiwetlik erzige höküm chiqirip, ularni heqliq, dep élan qilghan. En'gliye yuqiri soti en'gliye döletlik jinayi ishlar idarisining Uyghur élide ishlepchiqirilghan mehsulatlargha qarita jinayi tekshürüsh élip barmasliqini qanunsizliq, dep höküm qilghan. Bu kishilik hoquq teshkilatlirining Uyghur mejburiy emgek mehsulatlirini cheklesh tirishchanliqini zor ghelibisi, dep qaralghanidi.

“Shinjang géziti” qatarliq xitay hökümet taratqulirining xewerliride, ürümchidiki besh künlük yermenkige 50 tin artuq dölet, rayon we xelq'araliq teshkilatlarning qatnashqanliqi, Uyghur éli we xitayning herqaysi ölke, aptonom rayonliridin hem bingtüendin 2100 dek karxanining ishtirak qilghanliqini bildürmekte.