Xitaydiki tutqun qilin'ghan adwokatlarni qoyup bérish heqqide ochuq xet élan qilindi

Amérika adwokatlar jem'iyitining 30-yanwardiki tor xewiridin melum bolushiche, amérika we yawropada tonulghan 29 neper adwokat xitay re'isi shi jinpinggha ochuq xet yézip, 2015-yili 7-ayda tutqun qilin'ghan kishilik hoquq adwokatlirini qoyup bérishni telep qilghan.

Amérika awazi radiyosining bu heqtiki xewiride déyilishiche: “Xitay kishilik hoquqqa hörmet qilishi kérek” dep mawzu qoyulghan ochuq xetning deslepki nusxisi amérika adwokatlar fondining tetqiqatchisi térénsé xalli teripidin yézilip, 23-yanwar en'gliyening gwardiyan gézitide élan qilin'ghan. Mezkur ochuq xetke amérika adwokatlar fondining re'isi dawid kollins, b d t mehbuslarni qiynap soraq qilishni cheklesh ishxanisining sabiq tetqiqatchisi manférd nowak, firansiyening sabiq edliye ministiri robért badintér qatarliq amérika we yawropada tonulghan 29 neper adwokat imza qoyghan.

Mezkur xetke qol qoyghan adwokatlardin amérika adwokatlar fondining ijra'iye re'isi ajay méhrotra amérika awazining ziyaritini qobul qilip, mezkur xette 2015-yili 9-iyul yüz bergen 300 din artuq adwokatni tutqun qilish weqeside qolgha élinip, hazirgha qeder qoyup bérilmigen jang tyenyung, shé yang, li xéping, wang chüenjang qatarliq 20 din artuq adwokatning nami tilgha élin'ghandin bashqa, xitay türmiliridiki bashqa wijdan mehbuslirinimu qoyup bérish telep qilin'ghanliqini, xitayda dawamlishiwatqan saqchilarning tutqunlarni qiynap iqrar qildurush qilmishi qatarliq qanun'gha xilap qilmishlar eyiblen'genlikini bildürgen.