Xelq'ara kechürüm teshkilati adwokat jyang tyenyonggha bérilgen qamaq jazasini “Adaletsiz” dep eyiblidi

Xelq'ara kechürüm teshkilati ataqliq xitay kishilik hoquq adwokati jyang tyenyonggha bérilgen qamaq jazasini “Adaletsiz” dep eyiblep, uning derhal shertsiz qoyup bérlishini telep qildi.

Xitayning changsha sheherlik ottura sot mehkimisi seyshenbe küni jyang tyenyongni “Hakimiyetni aghdurushqa qutratquluq qilish” jinayiti bilen eyiblep 2 yilliq qamaq jazasigha höküm qilghan idi. Xelq'ara kechürüm bayanatida merkur organning xongkongda turushluq tetqiqatchisi wilyam niyning sözni neqil keltürüp, “Jyang tyenyong héchqandaq jinayet ötküzmidi. Uning adaletsiz sotlinishi xitay da'ilirining xitayda kishilik hoquqni jesurluq bilen qoghdawatqanlarni sistémiliq jazalawatqanliqining yene bir misali,” dégen.

Jyang tyenyong 2016‏-yili 11‏-ayda changshada tutqun qilin'ghan bolup, bu yil 1-ayda uning éghir ten jazasigha uchrighanliqgha da'ir xewerler tarqalghan idi. Jyang tyenyong buningdin burun 2012 -we 2014‏-yili ikki qétim tutqun qilinip qoyup bérilgen. U ilgiri Uyghurlargha chétishliq bezi nazuk siyasiy délolarning aqlighuchi adwkatliqini üstige alghan xitay adwokatlirining biri idi. U xitay hökümitining Uyghur rayonidiki siyasitini izchil tenqid qilip kelgen. Jyang tyenyong xitay da'ilirining 2009‏-yili “5‏-Iyul weqesi” din kéyin Uyghur rayonida alahide sot kolligiyelirini qurup, “5‏-Iyul weqesi” de tutqun qilin'ghan Uyghurlarni keng kölemlik sotlishini “Xitay qanunlirigha xlap” dep eyibligen. U, bu alahide sot kolligiyeliri “Qanuni tertiplerni qayrip qoyup, adaletsiz höküm chiqiriwatidu,” dégen idi.

Xelq'ara kechürüm teshkilati bayanatida “Jyang tyenyongning soti shütünley nomussizliq” dep eyiblep, uning atalmish “Jinayiti” ni iqrar qilishi we kechürüm sorishi da'iriler teripidin orunlashturulghan siyasiy tiyatir. Buning yasap chiqilish éhtimalliqi zor, déyilgen. Jyang tyenyong bu yil 8‏-ayda échilghan bir qétimqliq sotta, özining “Jinayiti” ni iqrar qilidighanliqini we kechürüm soraydighanliqini bildürgen. Uning sottiki bu sözi xitay axbarat ustilirida keng teshwiq qilin'ghan.