Хитай алма телефониниң инҗил вә қуран әплирини чәклигән

Хитай һөкүмити ислам вә христиан динлирини қаттиқ контрол қилип, бу динларни хитайлаштурушқа киришиш билән бир вақитта, алма телефониниң қуран вә инҗил әплириниму чәклигән. Хитайниң бу һәрикити 18-апрел әнглийәдики “експрес” гезитиниң тәнқидигә учриған. Мәлум болушичә, хитайниң алма телефонидики қуран вә инҗил әплирини чәклиши өткән йили башланғаникән. “експрес” гезитиниң хәвири христианлар 17-апрел әйса пәйғәмбәрниң тирилиш күни болған пасха байримини тәбриклигән бир вақитта елан қилинған.

“експрес” гезитиниң илгири сүрүшичә, хитайниң алма ширкитигә бесим ишлитип, бу икки әпни хитайдики алма телефониниң әп дукинидин чиқириветиши у диний әркинликкә давамлиқ зиянкәшлик қиливатқан бир вақитта йүз бәргән. Алма ширкити илгири бу икки әпни хитай даирилириниң тәлипи билән чиқиривәткәнликини билдүрүп, “биз йәрлик қанунларға әмәл қилишимиз керәк. Бизниң бәзи вақитларда һөкүмәтләр вә шериклиримиз билән тоғра йолда бирликкә келәлмәйдиған мурәккәп мәсилилиримиз болиду” дәп көрсәткәниди. “експрес” гезитиниң ейтишичә, “қуран мәҗид” намлиқ қуран епи хитайда бәш милйондин артуқ, “зәйтун дәрихи” намлиқ инҗил епи бир милйондин артуқ чүшүрилидикәнтуқ.

“қуран мәҗид” епиниң ясиғучиси, алма ширкитиниң өзлиригә хитай тор башқуруш идарисиниң қуран мәҗид епидә “қанунсиз мәзмунлар барлиқи” ни бекиткәнлики үчүн чиқиривәткәнликини ейтқанлиқи, өзлириниң бу мәсилини һәл қилиш үчүн хитай тор башқуруш идариси вә алақидар хитай тармақлири билән көрүшүватқанлиқини билдүргән. Көзәткүчиләрниң ейтишичә, хитайниң қуран епини алма телефониниң әп дукинидин чиқириветиши, мусулман дунясиниң һечқандақ инкасини қозғимиған.