Xitay alma téléfonining injil we qur'an eplirini chekligen

Muxbirimiz erkin
2022.04.18
Share on WhatsApp
Share on WhatsApp

Xitay hökümiti islam we xristi'an dinlirini qattiq kontrol qilip, bu dinlarni xitaylashturushqa kirishish bilen bir waqitta, alma téléfonining qur'an we injil eplirinimu chekligen. Xitayning bu herikiti 18-aprél en'gliyediki “Éksprés” gézitining tenqidige uchrighan. Melum bolushiche, xitayning alma téléfonidiki qur'an we injil eplirini cheklishi ötken yili bashlan'ghaniken. “Éksprés” gézitining xewiri xristi'anlar 17-aprél eysa peyghemberning tirilish küni bolghan pasxa bayrimini tebrikligen bir waqitta élan qilin'ghan.

“Éksprés” gézitining ilgiri sürüshiche, xitayning alma shirkitige bésim ishlitip, bu ikki epni xitaydiki alma téléfonining ep dukinidin chiqiriwétishi u diniy erkinlikke dawamliq ziyankeshlik qiliwatqan bir waqitta yüz bergen. Alma shirkiti ilgiri bu ikki epni xitay da'irilirining telipi bilen chiqiriwetkenlikini bildürüp, “Biz yerlik qanunlargha emel qilishimiz kérek. Bizning bezi waqitlarda hökümetler we shériklirimiz bilen toghra yolda birlikke kélelmeydighan murekkep mesililirimiz bolidu” dep körsetkenidi. “Éksprés” gézitining éytishiche, “Qur'an mejid” namliq qur'an épi xitayda besh milyondin artuq, “Zeytun derixi” namliq injil épi bir milyondin artuq chüshürilidikentuq.

“Qur'an mejid” épining yasighuchisi, alma shirkitining özlirige xitay tor bashqurush idarisining qur'an mejid épide “Qanunsiz mezmunlar barliqi” ni békitkenliki üchün chiqiriwetkenlikini éytqanliqi, özlirining bu mesilini hel qilish üchün xitay tor bashqurush idarisi we alaqidar xitay tarmaqliri bilen körüshüwatqanliqini bildürgen. Közetküchilerning éytishiche, xitayning qur'an épini alma téléfonining ep dukinidin chiqiriwétishi, musulman dunyasining héchqandaq inkasini qozghimighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.