Алма ширкитиниң хитайдики қуран епини чүшүрүветиши америкадики мусулманлар тәшкилатиниң тәнқидигә учриди

Мухбиримиз әркин
2021-10-15
Share

Алма ширкити хитай даирилириниң бесимида дунядики әң херидарлиқ әпләрниң бири болған "қуран мәҗид" ниң хитайдики епини чүшүрүвәткән. Б б с ниң хәвәр қилишичә, хитай даирилири бу әптә қанунсиз диний текистләрниң барлиқини илгири сүрүп, алма ширкитигә бесим қилған. Бирақ алма ширкити хитайниң конкрет қайси диний текистләрни қанунсиз, дәп көрсәткәнликини тилға алмиған. Хитай һөкүмити 2017-йили уйғурларға қарита башлиған чоң тутқунда қурани керим, җәйнимаз, һәдис китаблирини, намаз, һеҗап, сақал, тәсви, диний мәзмундики рәсим вә һөсни хәтләрниму диний радикаллиқниң ипадиси, дәп униңға четишлиқ йүз миңлиған уйғурни тутқун қилғаниди.

Б б с ниң билдүрүшичә, бу әпни ишләпчиқарған PDMS ширкитиниң бу һәқтики баянатида, "алма ширкитиниң сөзигә қариғанда бизниң қуран мәҗид деталимиз хитай әп дукинидин чиқириветилгән. Чүнки, бу әп хитай даирилири қошумчә мәлумат тәләп қилидиған мәзмунларни өз ичигә ‍алған" дейилгән. Алма ширкитиниң қарари америкадики аң чоң мусулманлар тәшкилати- "америка ислами мунасивәтләр кеңиши" ниң тәнқидигә учриған.

Бу тәшкилатниң баянатида, униң мәмликәтлик директори едвард ахмәт мичел "алма ширкити хитай компартийәсиниң буйруқиға бойсунуп, инҗил билән қуран әплирини чүшүрүветиш арқилиқ хитайниң уйғур мусулманлириға ирқий қирғинчилиқ қилишни өз ичигә алған диний зиянкәшликигә йол қойди" дегән. "америка ислами мунасивәтләр кеңиши" буниң алдида хилтон гуруһиниң хотәндә меһманхана селишиға қарши байқут елан қилғаниди. Едвард ахмәт мичелниң ейтишичә, 16-өктәбир американиң һәр қайси җайлиридики 40 тин артуқ хилтон меһманханилириниң алдида тәрбийә характерлик тәшвиқат паалийити елип баридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт