Xitayda kommunistlarning din'gha ishinishi cheklinidighanliqi yene tekitlendi

Xitayda kommunistlarning din'gha ishinishi cheklinidighanliqi yene tekitlendi.

Xitay xelq tori 27-dékabir “Kompartiye ezalirining din'gha ishenmesliki siyasiy intizam” témisida bash maqale élan qilip, xitay kompartiyisining 18-nöwetlik 6-omumi yighinida kompartiye ezalirining herqandaq diniy étiqad pa'aliyetliride bolushi qattiq cheklinidighanliqini tekitlidi.

Maqalide, 18-nöwetlik 6-omumi yighinda élan qilin'ghan belgilimilerdin“Kommunistlar xurapatliq pa'aliyetlirige qatnashmasliq, diniy étiqadqa ishenmeslik, qanunsiz diniy pa'aliyetlerde bolmasliq, milliy bölgünchilik küchlirige hemkarlashmasliq, zorawan guruhlargha qatnashmasliq, térrorluq pa'aliyetliride bolmasliq” qatarliq 6 belgilime alahide tilgha élinip, yuqiriqi belgilimilerning herqandaq birige xilapliq qilghan kompartiye ezasining intizam jazasi yaki qanuniy jazagha uchraydighanliqi alahide eskertilgen.

Xitay xelq gézitide élan qilin'ghan mezkur maqale weziyet analizchilirining diqqitini qozghidi. Amérikidiki weziyet analizchiliridin obzorchi chén pokung ependi öz qarishini otturigha qoyup,“Da'irilerning kompartiye ezalirining din'gha ishenmeslikini qayta tekitlishi yéngiliq bolmisimu, emma nöwette xitayda hakimiyet yürgüzüwatqan xitay kompartiye ezalirida omumiy keypiyatqa aylan'ghan idiyiwi dawalghush, bolupmu bir türküm kompartiye ezaliri arisida ewj éliwatqan diniy étiqad we gherb démokrat idiyisige mayilliqtin ensirewatqanliqining ipadisi” dédi.