Xitay kishilik hoquq pa'aliyetchisi 7 yérim yilliq késildi

Charshenbe küni tyenjin sheherlik 2- ottura sot mehkimiside échilghan bir sotta xitay kishilik hoquq pa'aliyetchisi xu shigén “Dölet hakimiyitini aghdurush jinayiti” bilen 7 yérim yilliq qamaqqa höküm qilin'ghan.

Melum bolushiche, sotta uninggha “Aghdurmichiliq idiyisini tarqitish” jinayiti artilghan bolup, uning soti échilghan mehkime etrapida qattiq bixeterlik tedbirliri élin'ghan.

Tyenjin sheherlik 2- ottura sot mehkimisi bu heqte élan qilghan bir bayanatida jawabkarning höküm ustidin shikayet qilmaydighanliqini bildürgen.

Shinxu'a axbarati bu heqtiki bir xewiride xu shigénning “Sot, jama'et xewpsizlik sistémisi we hökümetning inawitini tökmekchi bolghan” liqini körsetken.

Xewerde yene uning yuqiriqi iddiyeni bashqilarghimu singdürmekchi bolghanliqi éytilghan.

Xu shigén 1991- yili “Xitay erkinlik we démokratiye partiyesi” ni qurghan we 1992- yili “ Tyen'enmén qirghinchiliqi” ni xatirilesh pa'aliyiti uyushturghanliqi seweblik 16 yilliq qamaq jazasigha höküm qilin'ghan. U 2008- yili qoyup bérilgendin kéyin, 2014-yili yene bir qétim tutulup bir nechche hepte qamaqta yatqan idi.

Xitay da'iriliri ötken yili 9 ‏- iyul bashlighan öktichilerni bashqurush herikitide 300 neperge yéqin kishilik hoquq adwokati we pa'aliyetchisini qolgha alghan. Bulardin bir qismi tenbih we tehditler bérilgendin kéyin qoyup bérilgen bolsimu, yene bir qismi ta hazirghiche tutup turulmaqta.

Xu shigénmu yuqiriqi basturush herikitide ötken yili qolgha élin'ghan idi.

Xitay da'iriliri bular üstidin bu heptidin bashlap sot échishqa bashlighan. Seyshenbe küni tyenjin sheherlik 2- ottura sot mehkimiside échighan sotta béyjingdiki féngruy adwokatliq ornining bashliqi jey yenmin “Dölet xewpsizliki we jem'iyet muqimliqigha dexli yetküzüsh” jinayiti bilen jazagha tartqan we 4 yil kéchiktürülüp ijra qilinidighan 3 yilliq qamaq jazasigha buyrulghan idi.