Xitayda mal bahasi erzanlap pul qimmiti éship kétish xewpi kücheytmekte

Nöwette xitayning négizlik pul paxalliqi üch yildin buyanqi eng töwen sewiyege chüshken bolsimu, xitayda istémaldiki turghunluq mahiyette mal bahasining erzanlap pul qimmitining éship kétish xewpini kücheytken.

“Blumbérg xewerliri” ning bildürüshiche, nöwette xitayda istémal telipidiki turghunluq xitayning yilliq iqtisadi éshish pilanigha bésim shekillendürgen. Buning üchün xitay hökümiti a'ililerni pul xejleshke righbetlendüridighan téximu köp tedbirlerni élishi kérek iken. Xitay döletlik istatistika idarisi 8-séntebir 2024-yili 8-aydiki her xil yémeklik we énérgiye bahasi körsetküchining ötken yilning oxshash mezgilidikidin aran 0.3 Pirsent artqanliqi, keng da'iridiki istémal baha körsetküchining aran 0.6 Pirsent artip, kütken nuqtigha yetmigenlikini bildürgen.

“Blumbérg xewerliri” ning qeyt qilishiche, bu sanliq melumat dunyadiki 2-chong iqtisadi gewde bolghan xitayda istémal telipining ajiz ikenlikige da'ir deliller bilen teminligen. Shunga bu hal shirketlerning kirimi, ma'ash we xirajetning aziyishidek bu selbiy tereqqiyatning aldini élish üchün téximu köp tedbirlerni élish chaqiriqlirigha seweb bolmaqta iken. Firansiyelik iqtisadshunas mishél lam (Mechelle Lam) “Blumbérg xewerliri” ge qilghan sözide “Pul qimmitining éship kétish bésimi xitayda téximu éghirlishiwatidu” dégen. Uning körsitishiche, bu tereqqiyat xitayda “Mal bahasi we ma'ashning töwenlishini téximu kücheytishi mumkin” iken.

“Blmbérbérg xewerliri” ning éytishiche, nöwette xitay iqtisadi dölet ichi gheyriy sap ishlepchiqirish qimmiti körsetküchi boyiche 1999-yildin buyanqi eng uzun dawamlashqan mal bahasi töwenlesh weziyitige duch kelgen. Istémal we meblegh sélish telipining ajizliqi tokluq aptomobil we küntaxta sana'itige oxshash sahelerde jiddiy mal bahasi urushlirigha yol achqan bolup, bu xitayning iqtisadi éshishni besh pirsentke yetküzüsh pilanining emelge ashurush pursitini azaytmaqta iken.