Amérika hökümiti xitaydiki xelq namayishigha inkas qayturdi

Muxbirimiz eziz
2022.11.29
Share on WhatsApp
Share on WhatsApp

Ürümchidiki ot apitidin kéyin xitayning on nechche shehiride otturigha chiqqan xelq namayishigha qarita amérika hökümiti 28-noyabir küni resmiy inkas qayturdi. Aqsarayning bu heqtiki bayanatida bu namayishlar toghrisida “Biz uzundin buyan amérika we bashqa jaylardiki hemmila kishining tinch shekilde namayish qilish hoquqi bar, dep kéliwatimiz” déyilidu. Dölet bixeterlik kéngishining bayanatchisi jon kirbiy (John F. Kirby) Bu heqte muxbirlarning so'allirigha jawab bérip “Prézidént dunyadiki namayishchilar heqqide söz qilmaydu. Ularning özliri bu toghriliq söz qilidu” dégen.

“Nyu-york waqti” gézitining 28-noyabirdiki xewiride éytilishiche, aqsarayning xitaydiki namayishlar heqqidiki bayanati ularning irandiki xelq namayishigha qarita élan qilghan sözlirige sélishturghanda sus bolghan. Shu sewebtin amérika kéngesh palatasining ezasi téd kruz (Ted Cruz) özining heqtiki bayanatida téximu küchlük qilip: “Xitay hökümiti wirusning menbesi we aqiwiti heqqide izchil yalghan sözlep kéliwatidu. Emdi bolsa bu ishlar ularning sistémiliq heqler depsendichiliki, jümlidin shinjangdiki dawam qiliwatqan qirghinchiliq qilmishliri bilen bir yerdin chiqiwatidu” dégen. “Jenubiy xitay seher pochtisi géziti” bu xil küchlük tenqidni ipadiligenlerdin yene amérika awam palatasining re'islikini üstige élishqa teyyarliq qiliwatqan kéwin makkartiy (Kevin McCarthy) ningmu barliqini, uningmu téd kruzgha oxshash pikirde ikenlikini alahide eskertidu.

“Jenubiy xitay seher pochtisi géziti” ning obzorida éytilishiche, bir qisim mutexessisler we meslihetchiler, jümlidin washin'gton shehiridiki broking aqillar merkizining tetqiqatchisi rayan xas (Ryan Hass) aqsarayni xitaydiki xelq namayishigha arilashmasliq, shu arqiliq xitay hökümitining bu heriketlerni “Chet'el düshmen küchlirining buzghunchiliqi” déyishidin saqlinishqa dewet qilip kelmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.