Xitay hökümiti namayishqa qatnashqan puqralargha heywe qilishqa we ulardin öch élishqa bashlighan

Ürümchide yüz bergen ot apitidin kéyin, xitayning on nechche chong shehiride xitay hökümitining qamal siyasitige qarshi naraziliq namayishi qozghalghanidi. Xitay hökümitining bu namayishlar heqqide néme dégenliki melum emes, emma taratqularda tarqalghan bir widiyoda, 30-noyabir küni nechche onlighan tankaning béyjing kochilirida sheher ahalisige küch-heywe körsitip yürgenliki ashkarilan'ghan.

BBC Ning xewirige qarighanda, 30-noyabir küni kéchide gungju shehiride xitayning qamal siyasitige qarshi puqralar bilen saqchilar otturisida toqunush yüz bergen. Nurghun xitay puqraliri hökümetning uzaqqa sozulghan bu qamal siyasitining ürümchidiki ot apitige oxshash nurghun paji'elerning yüz bérishige seweb boluwatqanliqigha ishinidiken.

Yutub qaniligha chiqqan bir widiyoda, gungjudiki xitay puqralirining saqchilar we “Aq xalatliqlar” bilen élishiwatqanliqi körsitilgen. Yene bir widiyoda, 29-noyabir küni shendungning jinen shehiridimu namayish bolghanliqi körsitiligen bolup, ahaliler qamal-tosaqlarni bösüp ötüp, hökümet küchliri bilen élishqan we “Qamalni boshat, qamalni boshat!” dep sho'ar towlighan.

Ijtima'iy taratqularda xitay hökümitining bu namayishtin kéyin jiddiy heriketke ötkenliki, shangxey saqchilirining kochida téléfon tekshürüp, namayishqa chiqqanlarni tépiwalsa, kochidin yaki öyidin tutup kétiwatqanliqi heqqide xewerler tarqalmaqta.