Хитай һөкүмитиниң адәм ичкий әзалирини мәҗбурий йөткәватқанлиқиға даир йеңи мәлуматлар диққәт қозғиди

Мухбиримиз ирадә
2019-11-15
Елхәт
Пикир
Share
Принт

Австралийә дөләтлик университетиниң доктор аспиранти мәттив робертсон башчилиқида елип берилған тәтқиқаттин қариғанда, хитай һөкүмити системилиқ һалда хитайдики орган ианә қилғучилириға аит санлиқ мәлуматларда сахтилиқ ишлитиватқан болуши мумкин икән.

Хитай һөкүмити 2015-йили өзлириниң адәм ичкий әзалирини өлүмгә һөкүм қилинған җинайәтчиләрдин мәҗбурий елишни тохтитидиғанлиқини җакарлиған. Бирақ юқириқи тәтқиқатчиларниң тәтқиқат нәтиҗисдин қариғанда, хитай һөкүмитиниң бу һәқтики санлиқ мәлуматларда сахтилиқ ишлитиватқанлиқи һәққидә кишини чөчүтидиған испатлар бар икән. Чүнки хитай һөкүмити хитайдики ичкий әза инаә қилғучиларға вә шундақла йөткәп көчүрүлгән әзаларға аит тәминлигән санлиқ мәлуматлар бир-бири билән худди матиматика формуласиға охшаш зич җипсилишидиған болуп, бу күчлүк гуман қозғайдикән. Мутәхәссисләрниң қаришичә, бу адәттә мумкин болмайдиған бир әһвал икән.

«Медитсина әхлақи жорнили» да елан қилинған юқириқи бу тәтқиқат нәтиҗиисдә ейтилишичә, хитайдики адәм ичкий әзалирини йөткәш саһәси қараңғу бир саһә болуп, адәм ичкий әзалириниң мәнбәсини ениқлаш интайин қейин икән. Бирақ бу йәрдә ениқ болғини, хитай һөкүмитиниң йәнила мәҗбурий һалда ичкий әза йөткәватқанлиқи вә буни йошуруш үчүн сахта санлиқ мәлумат ясаватқанлиқи икән. 

«Муһапизәтчи» гезити бу һәқтики хәвиридә хитай һөкүмитиниң җинайәтчиләрниң ичкий органлирини, болупму уйғурларниң ичкий органлирини мәҗбурий йөткәватқанлиқ мәсилисиниң узундин бери оттуриға қоюлуватқанлиқи, юқириқи бу тәтқиқат нәтиҗисиниң бу һәқтики гуманларни йәниму күчлүк асас билән тәминләйдиғанлиқини баян қилған. Чүнки бу тәтқиқат нәтиҗисидин қариғанда, хитайда йилиға аз дегәндә 60 миң ичкий әза йөткәш оператсийәси елип бериливатқан болуп, бунчә көп әзаниң қәйәрдин кәлгәнлики зор диққәт қозғайдикән. 

Әнглийәдики «хитай коллегийәси» намлиқ бир мустәқил орган 24‏-сентәбир б д т кишилик һоқуқ кеңишидә гуваһлиқ берип, хитай һөкүмитиниң уйғурлар вә фалунгуң муртлириниң ичкий әзалирини мәҗбурий елип көчүрүватқанлиқи вә сетиватқанлиқини билдүргән. Бу уйғурларниң ичкий әза йөткәш қилмишиниң зиянкәшликигә учраватқанлиқиниң тунҗи қетим б д т да оттуриға қоюлуши болуп һесаблиниду.

Пикирләр (0)
Share
Толуқ бәт