Ши җинпиңни гитлерға охшатқан майка кийгән корейәлик яш җилинда тутқун қилинған


2016.11.02

Хитайниң җилин өлкисидә яшаватқан, корейә миллитидин болған яш вон йоң, ши җинпиңға қарши һәрикити сәвәблик тутқун қилинған.

Радиомиз хитайчә бөлүминиң хәвәр қилишичә, у 1-өктәбир күни ши җинпиңниң рәсими чүшүрүлгән вә гитлер дегән хәт бесилған майкини кийип ашкара кочиға чиққан. У кочиға чиқишниң алдида, өзиниң бу һәрикитидин америкидики достлирини хәвәрләндүргән вә шу күндин етибарән достлири билән алақиси үзүлгән, радиомиз мухбири йәрлик сақчи орунлириға телефон қилғинида, сақчилар вон йоңниң тутуп турулуватқанлиқини дәлиллигән.

Мәлум болушичә, вон йоң әслидә америкида оқуған болуп, у юртиға қайтқандин кейин һәр йили 4-июн тйәнәнмин оқуғучилар һәрикитини хатириләш вә түрмидики адвокатларға тәбрик картиси йоллаш қатарлиқ паалийәтләр билән шуғуллинип өзиниң хитай һөкүмитигә болған нарази мәйданини изчил һалда ипадиләп кәлгән.

Америкидики хитай оқуғучи вә тәтқиқатчилар федиратсийони алдинқи күни бу һәқтә бир баянат елан қилип, вон йоңниң тутқун қилинишини әйиблигән. Униң ши җинпиңни гитлерға охшитип майка кийишини әқәллий пуқралиқ һоқуқи дәп тәриплигән вә униң диктаторилиққа қарши җасаритигә апирин оқуған. Хәвәрдә униңдики өктичиликниң хитайниң җилиндики корейә миллитигә қаратқан сиясити билән алақиси бар-йоқлуқи тилға елинмиған, әмма униң тибәт әркинлик һәрикитини йеқиндин қоллиғучилардин икәнлики әскәртилгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.