Shi jinpingni gitlérgha oxshatqan mayka kiygen koréyelik yash jilinda tutqun qilin'ghan

Xitayning jilin ölkiside yashawatqan, koréye millitidin bolghan yash won yong, shi jinpinggha qarshi herikiti seweblik tutqun qilin'ghan.

Radi'omiz xitayche bölümining xewer qilishiche, u 1-öktebir küni shi jinpingning resimi chüshürülgen we gitlér dégen xet bésilghan maykini kiyip ashkara kochigha chiqqan. U kochigha chiqishning aldida, özining bu herikitidin amérikidiki dostlirini xewerlendürgen we shu kündin étibaren dostliri bilen alaqisi üzülgen, radi'omiz muxbiri yerlik saqchi orunlirigha téléfon qilghinida, saqchilar won yongning tutup turuluwatqanliqini delilligen.

Melum bolushiche, won yong eslide amérikida oqughan bolup, u yurtigha qaytqandin kéyin her yili 4-iyun tyen'enmin oqughuchilar herikitini xatirilesh we türmidiki adwokatlargha tebrik kartisi yollash qatarliq pa'aliyetler bilen shughullinip özining xitay hökümitige bolghan narazi meydanini izchil halda ipadilep kelgen.

Amérikidiki xitay oqughuchi we tetqiqatchilar fédiratsiyoni aldinqi küni bu heqte bir bayanat élan qilip, won yongning tutqun qilinishini eyibligen. Uning shi jinpingni gitlérgha oxshitip mayka kiyishini eqelliy puqraliq hoquqi dep teripligen we uning diktatoriliqqa qarshi jasaritige apirin oqughan. Xewerde uningdiki öktichilikning xitayning jilindiki koréye millitige qaratqan siyasiti bilen alaqisi bar-yoqluqi tilgha élinmighan, emma uning tibet erkinlik herikitini yéqindin qollighuchilardin ikenliki eskertilgen.