Шаңхәй шәһири қәшқәрдә «шинҗаңға нишанлиқ ярдәм бериш маарип гуруһи» ни қуруп чиққан

Мухбиримиз ирадә
2019-10-17
Елхәт
Пикир
Share
Принт

Тәңритағ ториниң хәвиригә қариғанда, «шинҗаңға нишанлиқ ярдәм бериш» дәйдиған сиясәт бойичә қәшқәрни һөддигә еливалған шаңхәй шәһири «шинҗаңға нишанлиқ ярдәм бериш маарип гуруһи» ни қуруп чиққан. Мәзкур органниң қурулуш мурасими 16-өктәбир күни қәшқәрдә өткүзүлгән.

Бу һәқтики хәвәрдә шаңхәй шәһириниң қәшқәрдә «маарип гуруһи» қуруши- «қәшқәрдики маарип сүпитини юқири көтүрүп, һәрбир пәрзәнтниң милләтләр иттипақлиқини қоғдайдиған вә шинҗаңни қуруп чиқиштики авангарт майсилардин қилип тәрбийәләп чиқиш арқилиқ йеңичә вәзийәттики йеңичә тәләпни қандуруп, узун муддәтлик капаләтни бәрпа қилиду,» дәп тәрипләнгән. 

Америка уйғур бирләшмисиниң рәиси елшат һәсән әпәнди хитай һөкүмитиниң уйғурлар зич олтурақлашқан қәшқәрдә шаңхәй билән маарип һәмкарлиқи гуруһи қурушини ата-анилири лагерға қамалғанлиқтин йетимханиларға йиғивелинған уйғур балилирини хитай маарипида тәрбийәләшкә мунасивәтлик болуши мумкин, деди. Униң қаришичә, хитай һөкүмити бу арқилиқ уйғур елигә йәниму көп хитай оқутқучиларни йөткәшкә һәрикәт қиливатқан болуши мумкин икән. 

Қәшқәр хәвәр ториниң хәвиригә қариғанда, 17-өктәбир күни йәнә қәшқәрдә 9-түркүмдә шәндуң өлкисидин шинҗаңға нишанлиқ ярдәмгә әвәткән партийәлик оқутқучилар вә 2019-йили йеңидин шинҗаңға нишанлиқ ярдәмгә кәлгән партийәлик оқутқучилар муһакимә йиғини уюштурулған. Хәвәрдә ейтилишичә, қәшқәр 2-оттура мәктәптә ечилған бу йиғинда барлиқ партийә әзалири «ши җинпиңниң ‹әслий мәқсәтни унтумай, бурчни әстә чиң сақлаш' тоғрисидики баянлиридин үзүндиләр» ниң бир қисим мәзмунлирини өгәнгән. Шундақла баштин-ахир «мәңгү кәтмәйдиған юқири сапалиқ оқутқучилар қошуни бәрпа қилиш» ни нишан қилип ишлигән хизмәтлирини тонуштурған.

Толуқ бәт