“Zimistan” tori: “Ichkiri ölkilerde Uyghurlarni dost tutqan xitaylarning dostini saqchigha melum qilishi telep qilinidu”

Muxbirimiz erkin
2019-11-15
Share

Italiyediki “Zimistan” namliq kishilik hoquq tori 14‏-noyabir élan qilghan bir xewiride ichkiri ölkilerdiki xitaylar Uyghurlarni dost tutsa dostini yerlik saqchi orunlirigha melum qilip qoyushi telep qilinidighanliqini bildürdi.

Xewerde qeyt qilinishiche, xitayning jyangshi ölkisidiki bir xitay tijaretchi bir Uyghur bilen soda qilish jeryanida tonushup dost bolup qalghan. Lékin bu dostluq wang yong isimlik bu xitaygha nurghun awarichiliq élip kelgen. Xewerde Uyghur aptonom rayonining sirtida turushluq musulmanlarning qattiq nazaret we kemsitish astida yashaydighanliqi, bu xil kemsitishning “Ashqunluqni tügitish” namida élip bériliwatqanliqi ilgiri sürülgen. 

Xewerde qeyt qilinishiche, wang yong isimlik jyangshiliq yuqiriqi xitay puqrasi bir qétim Uyghur dosti bilen uchriship, buni özi turushluq orundiki saqchi ponkitigha xewer qilmighanliqi üchün özining teqib astigha élin'ghanliqini bildürgen.

Lékin “Zimistan” torining xewiride wang yongning Uyghur dostining ismi we uning qaysi yurtluq ikenlikini tilgha élinmighan. Uning bildürüshiche, ichkiy ölkilerde “Shinjangdin kelgen kishiler birdek térrorchi” dep qarilip, ulargha xitayning “Térrorluqqa qarshi turush qanuni keng ijra qilinidiken.”

Wang yong özining Uyghurlar bilen qerellik uchriship turushi saqchilarning diqqitini qozghap, özining agahlandurulghanliqini bildürgen. Uning qeyt qilishiche, saqchilar uninggha “Uyghurlardin yiraq turushini, chünki ularning térrorchi” ikenlikini tekitligen. Lékin wang yong özining bu agahlandurushqa qulaq salmighanliqini, saqchining shu seweblik özige 2000 yüen jerimane qoyghanliqini bildürgen.

Wang yongning qeyt qilishiche, nöwette ichkiri ölkilerdiki Uyghurlarni öy ijare élip olturushi mumkin emes iken. Xewerde bu ehwalning bu yil6‏-ayda xénendiki puyang shehiridimu yüz bergenliki, on nechche saqchining bu sheherde öy ijare élip olturuwatqan bir Uyghur er-ayalning öyige basturup kirip, ularni bu öydin qoghlap chiqarghuziwetkenliki ilgiri sürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet