Xitayning hemmila kishini “Süküt” ke mejburlishi diqqet qozghimaqta

Muxbirimiz eziz
2019.10.08

Xelq'arada xitayni tenqidlesh ewjige chiqiwatqanda xitay hökümitiningmu iqtisadiy “Tizginek” arqiliq xelq'araning aghzini yumdurmaqchi bolushi bu heqtiki endishilerni kücheytmekte.

“Nyu-york waqti” gézitining 7-öktebirdiki tehrirat maqaliside éytilishiche, amérikidiki dangliq waskétbol komandiliridin “Xyuston rakéta” komandisining bash ghojidari daryl moréy birnechche kün ilgiri “Erkinlik üchün küresh qilayli! biz xongkong bilen bille” dégen qurlarni özining tiwéttér bétide tarqatqan hemde özining xongkongdiki démkratiye namayishini qollaydighanliqini bildürgen. Emma buningdin anche ötmeyla xitay tereptin buninggha qarshi keskin “Qayturma hujum” yétip kelgen: xitaydiki dangliq ayaq shirketliridin bolghan “Li ning ayaghliri”, shangxeydiki pudong tereqqiyat bankisi qatarliqlar derhalla özlirining “Xyuston rakéta” komandisini iqtisadiy jehettin qollash toxtamlirini bikar qilghan؛ xitay téléwiziye istansiliri buningdin kéyin “Xyuston rakéta” komandisining musabiqilirini téléwiziyede bermeydighanliqini bildürgen؛ xitay waskétbol birleshmisi bolsa özlirining ular bilen bolghan alaqisini waqtinche toxtitip qoyidighanliqini jakarlighan.

Bu xildiki qatmu-qat bésimlar aldida “Xyuston rakéta” komandisining xojayinliri “Soda bilen siyaset bir-biridin perqliq ikki nerse” dégen chüshenchini tekitlep, özlirining tenterbiye ishlirida xitay hökümitining alaqidar “Belgilimiliri” ge hörmet qilidighanliqini bildürgen. “Xyuston rakéta” komandisining gholluq topchiliridin jéymés xardén özlirining bu mesilide xitaydin epu soraydighanliqini bildürgen.

Maqalida éytilishiche, amérikadiki “Döletlik wastkétbol birleshmisi” (NBA) mu del mushu xildiki ehwalgha duch kelgen bolup, Uyghurlar diyaridiki milyonlighan kishining lagérgha qamilishidek ré'alliq aldida iqtisadiy menpe'etni birinchi orun'gha qoyghan hemde xitayni eyibleshtin özlirini epqachqan.

Maqalida mushu ehwallar omumlashturulup “Ashu insanlar xitaygha bash égish bedilige érishken bayliq emeliyette dölitimizdiki erkinlikning mehsuli emesmidi?bomba saqili bilen meshhur bolghan jéymis xardén özidek saqal qoyghan Uyghurlarning türmige chüshidighanliqini bilemdighandu?” dep so'al qoyidu. Shuningdek heqqaniyet bilen adalet otturisidiki bu xil sürkilishte herqachan bir türküm kishilerning “Süküt qilish eng aqilanilik” dep ish körüwatqanliqi mesxire qilinidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.