Xitay siyasiy kéngishining tibet wekili tibetlerge omumyüzlük heqsiz mu'amile qilishni toxtitishqa chaqirghan

Xitayning béyjingda ötküzülüwatqan siyasiy kéngishining memliketlik yighinida bir tibet wekil söz qilip, tibetlerni omumyüzlük kemsitishke xatime bérishni telep qilghan.

“Jenubiy xitay etigenlik géziti” ning xewer qilishiche, xitay memliketlik siyasiy kéngesh ezasi, xitay herbiy sen'et ömikining sabiq naxshichisi gowa jyamawji siyasiy kéngeshning seyshenbe küni échilghan guruppa muzakiriside 2008‏-yil yüz bergen “Lxasa weqesi” din kéyin tibetlerni omumyüzlük kemsitishning éghirlashqanliqini bildürgen.

Gowa jyamawji, da'irilerning tibetlerni kemsitishi “Milletler ittipaqliqigha zererlik” ikenlikini eskertip, “Men bölgünchilerge taqabil turush tedbirliri pütün tibet millitini nishan'gha almasliqi kérek, dep qaraymen” dégen. Bu yil 54 yashliq gowa jyamawji chingxeyning tibetler rayonida tughulghan bolup, u uzun yil tibet herbiy rayonining sen'et ömikide ishligen. U, özining herbiy unwani bar we memliketlik siyasiy kéngeshning ezasi bolsimu, biraq milliti tibet bolghanliqi üchün ichkiri ölkilerde yataq alalmighanliqini, buning indiwidu'al hadise emesliki, pütün tibetlerning bu mu'amilige uchrawatqanliqini bildürgen.

Uning körsitishiche, az sanliq milletlerge qaritilghan kemsitish yuqiriqi saheler bilen cheklinip qalmaydiken. U, kemsitishning téléfon alaqisidimu ipadiliniwatqanliqini bildürüp, “Ichkiri ölkilerde tor alaqisining tézlik süriti4G, biraq tibetning bir qisim rayonlirida we shinjangda bu yenila 2G da turuwatidu” dégen.

Uyghur aptonom rayonida ilgiri torning tézlik süriti 4G bolghan bolsimu, lékin da'iriler 2014‏-yildin kéyin uning süritini 2G gha chüshürüp qoyghan idi. Uning ilgiri sürüshiche, az sanliq milletler rayonliridiki jiddiylikni peseytishning charisi hökümet organliridiki az sanliq millet kadirlirining sanini köpeytish iken. U, “Ichkiri ölkilerdin kelgen kadirlar 2-3 yildin kéyin téximu yuqiri mensepke ösüp kétidu. Biraq yerlik kadirlar menggü shu yerde qalidu” dégen.