Tibet pa'aliyetchining besh yilliq qamaqqa höküm qilinishi zor ghulghula qozghidi

Birleshme agéntliqning xewirige qarighanda, xitay sot mehkimisi 22-may küni tibet dukandar tashqi wangchukni besh yilliq qamaqqa höküm qilghan.

Melum bolushiche, tashqi “Nyo -york waqti” gézitining muxbirliri tibet rayonigha höjjetlik filim ishleshke kelgende tibet medeniyiti we tibet til-yéziqining yoqiliwatqanliqini heqqide pikir qilghan. Bu heqtiki in'glizche maqale we qisqa sin filimi torlarda keng tarqalghandin kéyin xitay hökümiti 2016- yili uni qolgha alghan.

Melum bolushiche, bu yil 32 yashqa kirgen tashqi eyni waqitta höjjetlik filimda söz qilghan hemde tibet xelqining qattiq bésim we qorqunch ichide yashawatqanliqini, özining “Tibet medeniyiti mushu yosunda weyran bolup kétermu” dégen endishidin xali bolalmay kéliwatqanliqini bayan qilghan iken.

Alaqidar heq we hoquq teshkilatliri bolsa uning bayan qilghanliri emeliyette del xitay hökümiti ijra qiliwatqan “Ma'aripta we xizmette xitaychini asas qilish” arqiliq tibet til-yéziqini we medeniyitini yeklesh yüzlinishining wasitilik eks étishi iken.

“Jenubiy xitay sehiri géziti”ning xewiride éytilishiche, tashqi wangchuk éytqan ehwal Uyghurlar diyaridimu eynen yüz bériwatqan bolup, xitay köchmenlirining kelkün kebi yopurulup kélishi bilen yerlik milletlerning yeklinishi barghanséri éghirlap mangmaqta iken. Shuning bilen birge héch yerni ala qoymighan nazaret méxanizmi we qattiq qolluq bilen ijra qiliniwatqan “Idiye özgertish” herikiti Uyghurlarning xitay kompartiyesige bolghan sadaqitini ashurushni meqset qilmaqta iken.