Xitaydiki bir qisim musteqil tor betler “Qanunsiz” dégen seweb bilen taqalghan
2017.01.25
Istansimizning xewer qilishiche, xitayning intérnét - uchur bashqurush idarisi yéqinda 17 tor betni taqighanliqini élan qilghan bolup, bu tor betler ichide xitaydiki tonulghan musteqil iqtisadshunas maw yüshining “Tiyenzi iqtisad instituti” tor béti we uninggha yandaq bir qanche tor betler bar iken. Da'iriler yene maw yüshining wéybo toridiki shexsi uchur hésabinimu taqiwetken.
U, xitaydiki medeniyet inqilabini we xitay kompartiyisining qurghuchisi maw zédungni ochuq - ashkara tenqid qilghuchilarning biri bolup, u téxi yéqinda xitayda küchiyiwatqan mawchi heriketni we maw zédungchilarni tenqid qilip maqale yazghan iken.
Xitayning hökümet awazi hésablinidighan “Yer shari waqti géziti” bu heqtiki xewiride yuqirida taqalghan tor bet we shexsi hésablarning “Resmiy ruxsiti bolmay turup öz aldigha yalghan, saxta xewer” lerni tarqatqanliqini ilgiri sürgen. Da'iriler maw yüshining özige téléfon qilip, uning tor béti qanunsiz bolghanliqi üchün taqalghanliqini uqturghan. Istansimiz muxbiri maw yüshining tor bétining taqilish sewebini sorap béqish üchün xitayning intérnét - uchur bashqurush idarisige téléfon qilghan bolsimu, téléfon'gha chiqqan xadim so'algha jawab bérishni ret qilghan.
Melum bolushiche, bu qétim yene béyjingdiki wang jyensung qatarliq bir qanche musteqil akadémiklarningmu ündidar hésabliri taqiwétilgen bolup, ular buni xitay hökümitining lébiral awazlarni jimiqturush herikiti, dégen. Amérikidiki xitay aktiwist wu zoley radi'omizgha qilghan sözide, xitay hökümitining nöwette musteqil pikir qilidighan ziyaliylar we tetqiqatchilarning péyige chüshkenlikini we bu herikitinimu yuqiridiki mawchilar arqiliq élip bériwatqanliqini bildürgen.