Хитайда «көпүкчә ваба» билән юқумлиниш вәқәси көрүлгән

Мухбиримиз ирадә
2020-07-07
Елхәт
Пикир
Share
Принт

Хитайниң ички моңғулийә районида бир чарвичиниң «көпүкчә ваба» билән юқумланғанлиқи җәзмләштүрүлди.

«Ню-йорк вақти» гезитиниң хәвәр қилишичә, юқиридики бу вирусниң қайтидин көрүлүши бүгүнкидәк дуня таҗсиман вирус билән күрәш қиливатқан мәзгилдә, кона тәһдитләрниң йәнила мәвҗутлуқидин дерәк беридикән.

Хәвәрдә көрситилишичә, баяннур шәһәрлик сәһийә комитети йәкшәнбә күни чарвичиға ваба билән юқумланған, дәп диагноз қоюлғанлиқини, униң һазир дохтурханида давалиниватқанлиқини, вәзийитиниң муқимлиқини ейтқан.

Мәзкур комитет йәнә үчинчи дәриҗилик агаһландуруш уқтуруши тарқитип, кишиләрни юқумлиниш еһтималлиқи болған һайванларни овлимаслиқ вә йемәсликкә, болупму өлгән яки кесәл болған чашқанларни доклат қилишқа чақирған.

Шәһәрлик һөкүмәт вабаниң алдини елиш тәдбирлирини йолға қойған болуп, улар бу йилниң ахириғичә күчкә игә болидикән.

Оттура әсирдә «қара өлүм» дәп тонулған бу ваба әслидә йерсиня зияндаш һашарат бактерийәсидин келип чиққан болуп, юқумланған чашқанлардики бүргиләр арқилиқ тарқилидикән.

Дуня сәһийә тәшкилати бу һәқтики баянатида көпүкчә ваба билән давалиналмиған бимарларниң тәхминән% 30 тин% 60 нисбитиниң өлүм билән нәтиҗилинидиғанлиқини билдүргән. Әгәр антибиотик дорилар балдур берилсә, кесәлликни сақайтқили болидиғанлиқини ейтқан.

Пикирләр (0)
Share
Толуқ бәт