Хитайдики вирус вабасида өлгәнләрниң сани дуняни һәйран қалдурмақта

Мухбиримиз әзиз
2023.02.16

Узун муддәт “вирусни нөлгә чүшүрүш” сияситини иҗра қилған хитай һөкүмити ‍үрүмчи шәһридики “24-ноябир от апити”дин кейин йүз бәргән бир қатар пуқралар намайиши сәвәбидин 2022-йили декабирда “таҗисиман вирусини контрол қилиш қамал чарилири”ни бикар қилған иди. Йеқинда ашу қамал чарилири бикар қилинғандин буян хитайда партлиған вирус юқумида аз дегәндиму 1 милйондин 1 милйон 600 миңғичә кишиниң өлгәнлики дәсләпки қәдәмдә муқимлаштурулди.

“нйо-йорк вақти гезити”ниң 15-февралдики обзорида ейтилишичә, хитай һөкүмити 9-феврал күни “һазирғичә болған икки ай ичидә дөлитимиздә вирус сәвәбидин өлгәнләр 83 миңдин ашиду” дәп елан қилған. Ғәрп мутәхәссислири вә анализчилар бу санниң пәқәт дохтурханида җан үзгән юқумдарларнила көрситидиғанлиқини, дохтурханида йетиш имканийити болмай өйлиридә өлгән кишиләрни өз ичигә алмайдиғанлиқини тәкитлигән. Мәзкур гезитни санлиқ мәлуматлар билән тәмин әткән мутәхәссисләр гурупплири бирдәк “хитайдики йеңи вирус долқунида аз дегәндиму бир милйондин артуқ адәм өлгән. Бу мөлчәр биз игилигән испатлар билән толуқ мас келиду” дегән.

Обзорда ейтилишичә, хитайда зади қанчилик адәмниң өлгәнлики хитай компартийәси үчүн бәкму әһмийәтлик мәсилә болуп қалған. Чүнки таҗисиман вирусиға қарши бир қатар контрол чарилири дәсләпки қәдәмдә иҗра болғанда, ши җинпиң рәһбәрликидики хитай компартийәси “биз қолланған вирусқа қарши туруш тәдбирлири өлүм-йитимни зор дәриҗидә төвәнлитип, сотсиялистик түзүмниң ғәрп капитализимидин қанчилик әвзәл икәнликини йәнә бир қетим намайән қилди” дәп махтанған.

Нөвәттә хитай һөкүмити изчил түрдә таҗисиман вируси һәққидики һәрқандақ учурни мәхпийәтлик қатарида тутуп келиватқанлиқтин вирусқа қарши қамал чарилири бикар қилинғандин буян зади қанчилик кишиниң вирустин юқумланғанлиқи сир болуп кәлгән. юқумлуқ кесәллик мутәхәсислири бу җәһәттики санлиқ мәлуматлар вә башқа пакитларға асасән “нөвәттә аз дегәндиму хитай пуқралириниң 90 пирсәнти вирустин юқумланған” дәп хуласә чиқарған. Йәнә бәзиләр болса бу санни 80 пирсәнт әтрапида, дәп қарашқа майил болуватқанлиқи мәлум.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.