Xitay milyonérliri xitaydin qéchishning yolliri izdimekte

Bash ishtabi londondiki xelq'ara meblegh salghuchi köchmenler mulazimiti shirkiti “Hénléy shérikchiliki” (Henley & Partners) teminligen sanliq melumatqa asaslan'ghanda, 2024-yilda bashqa döletlerge köchmen bolushni pilanlighan xitay baylirining sani 15 ming 200 ge yetken.

“Eljezire” qanilining 8-yanwar bergen bu xewiride, bir nechche yil burun xitayni tashlap chet elde makanlashqan xitay bayliri ziyaret qilin'ghan bolup, ularning bildürüshiche, pul tapqan xitay baylirining köpinchisi xitayning kelgüsidiki ma'arip, sehiye, dawalinish, sughurta ishlirigha ümidsiz qaraydiken. Eng muhimi, ular milyonlap tapqan pullirini xitay bankisida qoyushtin qorqidiken, pullirini chet el bankilirigha, héchbolmighanda, xongkong bankilirigha qoysa xatirjem bolidiken. Yene kélip shi jinping hökümitining “Chiriklikke zerbe bérish” bahaniside, tuyuqsizla xitaydiki yuqiri téxnika, pul-mu'amile sahesidiki dangdar shexslerni ujuqturup, bir kéchidila weyran qiliwétishi xitaydiki milyardér we milyonérlarni sarasimige séliwetken.

Xitayning yéqinqi 10 yildin buyan iqtisadiy chöküsh dewrige kirgenliki, öy-mülük bazirining kasatliship, öy bahasining 8 pirsent chüshkenliki, yashlarning ishsizliq nisbitining biraqla örlep, 17 pirsentke yetkenliki melum bolghanidi. Bu hal xitay baylirining xitayning kelgüsining parlaq bolushigha ishenmeslikini keltürüp chiqarghan. Bu heqte pikir bayan qilghan xitay bayliri xitay jem'iyitining, jümlidin xitay iqtisadining ishenchsizlikke tolghan dawalghush dewrige kirgenlikini, shunga özlirining shirket-zawutliri, mal-bayliqini chet'elge yötkep kétishning eng yaxshi chiqish yoli ikenlikini bildürgen.

“Hénléy shérikchiliki” ning 2024-yilliq doklatida bildürülüshiche, 2024-yil xitay bayliridin 13 ming 800 kishi öz bayliqini chet elge yötkiyeligen bolup, 2022-yiligha baqqanda 28 pirsent örligen. 2025-Yiligha barghanda, bu sanning 15 ming 200 ge yétidighanliqi mölcherlen'gen.

Xewerde éytilishiche, xitay baylirining chet elge qéchishi xitay iqtisadining chöküshini téximu tézleshtüridiken. Xitay hökümiti buninggha jiddiy tedbir qollan'ghan bolup, ilgiri her bir xitay puqrasi yiligha 50 ming dollarni chet'elge salalighan bolsa, hazir 50 ming yüen (7 ming dollar) din artuq pulni chet'elge sélish üchün munasiwetlik organlargha melum qilish belgilimisini chiqarghan. Shundaqtimu xitay bayliri her xil amallarni tépip, öz bayliqini qutquzushqa muweppeq bolalighan.