Pirézidént trampning xitay mallirigha qoyidighan qoshumche 10 pirsent tamozhna béji 4-marttin bashlap yolgha qoyulidiken

Amérika pirézidénti donald trampning kanada bilen méksikagha qoyghan 25 pirsent tamozhna béji 4-mart künidin bashlap resmiy yolgha qoyulush bilen bir waqitta, xitay mallirigha qoyghan 10 pirsent qoshumche tamozhna béjimu resmiy yolgha qoyulushqa bashlaydiken.

Pirézidént tramp ötken hepte xitayning féntanilni chekleshte yéterlik tedbir qollanmighanliqini bildürüp, xitay mallirigha yene qoshumche 10 pirsent baj qoyush mumkinlikini élan qilghan. Eger pirézidént trampning féntanil sewebidin xitay mallirigha qoyidighan qoshumche 10 pirsent béji 4-mart resmiy yolgha qoyulsa, buning bilen uning xitay mallirigha qoyidighan omumi tamozhna béjining 20 pirsentke chiqidighanliqi qeyt qilinmaqta. Pirézidént tramp ötken ayda xitayning féntanilni cheklimigenliki üchün 10 pirsent, méksika bilen kanadagha 25 pirsent baj qoyidighanliqini bildürgen. Arqidin kanada bilen méksikagha qoyulidighan tamozhna béjining 30 kün kéchiktürülgenlikini uqturghan idi.

Halbuki, BBC ning xewer qilishiche, amérika soda ministiri xoward lutnik 3-mart küni kanada bilen méksikagha qoyulghan tamozhna béji pilan boyiche ijra qilinsimu, konkrét baj miqdarining muzakirige baghliq ikenlikini éytqan. Lékin xewerlerde béyjingni féntanilning amérikagha kirishini tosushta yéterlik tedbir qollanmasliq blen eyibligen tramp hökümitining, xitay mallirigha qoyghan 10 pirsent qoshumche tamozhna béjining 4-mart yérimidin bashlap yolgha qoyulidighanliqi kütülmekte iken. Nöwette, xitay amérikaning qoshumche 10 pirsent tamozhna béji qararigha qarita öch élish tedbiri qollinidighanliqidin bésharet bergen.

“Heptilik xewerler” zhurnilining bildürüshiche, xitay soda ministirliqi ötken jüme küni “Eger amérika bir tereplime tamozhna béji élishta ching turup, alaqidar tedbirlerni resmiy yolgha qoysa, xitay jezmen küchlük taqabil turush tedbirlirini alidu” dégen. BBC, analizchilarning béyjing yenila omumyüzlük soda urushining aldini élishni, tramp hökümiti bilen kélishim hasil qilishni ümid qilidu, dep qaraydighanliqini qeyt qilghan bolsimu, emma xitayning “Yer shari waqti géziti”, béyjing da'irilirining bir qatar taqabil turush tedbirlirige teyyarliq qiliwatqanliqini, amérikaning déhqanchiliq we yémeklik mehsulatlirini nishan'gha élishi mumkinlikini bildürgen.